“Бага насны хүүхдийн бэлгийн хүчирхийллийн эсрэг” кино хэлэлцүүлэг маргааш 12:00 цагт “Shonkhor tower”-т болох юм байна. Тус хэлэлцүүлгийг “Ардчилсан Хүчний Холбоо” ТББ-ын дэргэдэх “Эрүүл мэндийн клуб”-ээс санаачлан зохион байгуулж байгаа бөгөөд хэлэлцүүлэгт УИХ-ын гишүүд, холбогдох албаны хүмүүс оролцох аж. Хэлэлцүүлэгтэй холбогдуулан хэлэлцүүлгийн эхэнд бодит түүхээс сэдэвлэн бүтээсэн БНСУ-ын “Хүсэл” киног үзэж, дараа нь хэлэлцүүлгийн үргэлжлүүэх гэнэ.

Сүүлийн үед олон нийтийн санааг зовоосон нэгэн асуудал бол “гэр бүлийн хүчирхийлэл” юм. Тэр дундаа бага насны хүүхдийн бэлгийн хүчирхийлэлд өртөх байдал буурахгүй байгаа нь нийгэмд хэдийнээ түгшүүрийн харанга дэлдэхэд хүрээд байна. Тиймээс саяхан МҮОНРТ-ийн MNB.MN сайтаас санаачлан олон нийтэд хүчирхийллийн бодит аюул, хор уршиг, түүнээс хэрхэн урьдчилан сэргийлэх талаар зөв ойлголт өгөх үүднээс бүх сэтгүүлчдийн дунд “нийтлэл, бичлэг”-ийн уралдаан зарлан шилдэг бичлэгийн эздийг шалгаруулан дүнгээ гаргаж байсан билээ.