УИХ-ын чуулганы үдээс өмнөх хуралдаан өндөрлөлөө. Үдээс хойшхи хуралдаан 14.00 цагт эхэлж, Засгийн газрын цагтай. Засгийн газрын цагаар УИХ-ын гишүүн Д.Оюунхорол, Ж.Эрдэнбат нараа Сангийн сайдад хүргүүлсэн асуулгын хариуг сонсох юм. УИХ-ын гишүүдийн асуулгад хариулсны дараа цаг үлдвэл УИХ-ын чуулганы хуралдаанаар хэлэлцэх бусад асуудлаа үргэлжлүүлэн хэлэлцэх боломжтой гэж УИХ-ын дарга мэдэгдлээ. Үүнд,  Засгийн газрын гишүүнийг  огцруулах тухай, Засгийн газрын тухай хуульд нэмэлт оруулах тухай хуулийн төсөл, Эмийн талаар төрөөс баримтлах бодлого батлах тухай төслүүд багтаж байгаа.

УИХ-ын гишүүн О.Баасанхүү Хууль зүйн сайд Х.Тэмүүжинг  огцруулах асуудлыг УИХ-д өргөн барьсан ч холбогдох байнгын хорооны хурал нь хойшлоод байсан. Гэвч  өчигдөр Хууль зүйн байнгын хороо гэнэтийн хурал зарлаж,  энэ асуудлаар хаалттай хуралдсан. Байнгын хорооны гишүүдийн олонхи нь Хууль зүйн сайд Х.Тэмүүжинг огцруулах нь зүйтэй гэсан саналыг гаргасан билээ. Тиймээс энэ асуудлыг өнөөдөр хэлэлцэх байсан боловч хойшилж магадгүй болоод байна. Учир нь 14.00 цагт эхлэх Засгийн газрын цаг 18.00 цагаас өмнө дуусахгүй бол Х.Тэмүүжин сайдыг огцруулах асуудлыг хэлэлцэхгүй, дараа долоо хоногийн чуулганы хуралдаанд шилжүүлж болох юм.