Мэргэжлийн эмэгтэй теннисчдийн холбооны /WTA/ сүүлийн чансаагаар 12-т бичигдэж буй дэлхийн экс тэргүүн теннисчин Сербийн Ана Иванович.

Германы Штуттгарт хотноо болж буй Porsche Tennis Grand Prix тэмцээний хоёрдугаар тойрогт Сербийн Ана Иваннович шалгараад байна.

Энэ сарын 21-нд эхэлсэн "Porsche Tennis Grand Prix-2014" тэмцээнд Польшийн Агнешка Радваньска, өнгөрсөн жилийн тус тэмцээний аварга ОХУ-ын Мария Шарапова нарын тэргүүтэй шилдэг теннисчид оролцож байна. Тэмцээний эхний тойргийн тоглолт өчигдөр/04,23/ болж, хоёрдугаар тойрогт өрсөлдөх теннисчид тодорлоо.

Тэмцээнд есд эрэмбэлэгдэн тоглож буй Сербийн Ана Иваннович 2011 оны "Уимбльдон"-ы дэд аварга Германы Сабини Лисицкиг 6:1, 6:3-ийн харьцаагаар буулган авснаар хоёрдугаар тойрогт шалгарлаа. Тэрээр шөвгийн наймд шалгарах эрхийн төлөө Германы Юлия Гёргестэй оноолт таарчээ. Тэмцээнийг тэргүүлэн тоглож буй Польшийн Агнешка Радваньска Италийн Роберта Винчи, өнгөрсөн жилийн аварга, зургаад эрэмбэлэгдэн тоглож буй ОХУ-ын Мария Шарапова нутгийн теннисчин Анастасия Павлюченковатай 1/8-д оноолт таарсан байна.

Тэмцээнд наймд эрэмбэлэгдсэн Италийн Сара Эррина, ОХУ-ын Алиса Клейбанова нар шөвгийн наймын эхний эрхийг аваад байна. Алиса Клейбанова тэмцээнд гуравт эрэмбэлэгдсэн Чехийн Петра Квитоваг 6:2, 7:6-ийн харьцаагаар буулган авчээ. Хоёрдугаар тойргийн үлдсэн тоглолтууд өнөө шөнө болж, шөвгийн наймын теннисчид бүрэн тодрох юм.

Нийт 644 мянган ам.долларын шагналын сантай Porsche Tennis Grand Prix тэмцээний ганцаарчилсан болон хосын төрлийн аваргууд ирэх ням гаригт /04.27/ тодорно.