Нийгмийн бодлого, боловсрол, шинжлэх ухааны байнгын хорооны өнөөдрийн хуралдаанаар УИХ-ын гишүүн О.Баасанхүүгийн өргөн барьсан Тамхины хяналтын тухай хуульд нэмэлт, өөрчлөлт оруулах тухай хуулийн төслийг хэлэлцлээ. Энэ хуулийн төсөл нь өнгөрсөн онд баталсан хуульд нэмэлт өөрчлөлт оруулж, тамхи татах тусгай цэгтэй болох, сургууль, цэцэрлэгээс 500 метр дотор тамхи худалдаалахгүй гэснийг байр орц, 500 алхам гэж өөрчлөхөөр оруулж ирсэн. Тамхины хяналтын тухай хууль нь цаг үеэ олсон сайн хууль болсон ч алдаа дутагдал байгаа гэдгийг гишүүд шүүмжилсэн. Тухайлбал, сургууль, цэцэрлэгээс 500 метрийн зайд гэхээр хөдөө сумдад үйлчлэх боломжгүй болоод байсан юм. Тиймээс О.Баасанхүү гишүүний санаачилсан хуулийн төслийн өөрчлөлтийг дэмжиж батлах ёстой гэдгийг хэлэх гишүүд олон байсан юм.  Тиймээс энэ хуулийн төслийг УИХ-ын чуулганы хуралдаанаар хэлэлцэх нь зүйтэй гэж байнгын хорооны гишүүдийн олонхи нь дэмжсэн юм.

Үүний дараа  тус байнгын хорооны хуралдаанаар Засгийн газраас өргөн барьсан "Эмийн талаар төрөөс баримтлах бодлого батлах тухай" УИХ-ын тогтоолын төслийг хэлэлцлээ. Төрөөс эмийн талаар баримтлах бодлогын баримт бичиг шинээр батлагдсанаар эмийн зохицуулалтын үйл ажиллагаа олон улсын жишигт нийцэж боловсронгуй болох, эмийн чанар, аюулгүй байдлыг хангах, эм, эмнэлгийн хэрэгсэл худалдан авахыг зохицуулах, чанарыг сайжруулах чухал ач холбогдолтой гэдгийг Эрүүл мэндийн сайд танилцуулсан. Тогтоолын төсөлтэй холбогдуулан УИХ-ын гишүүд асуулт тодруулга авч, саналаа илэрхийлсэн.

Тухайлбал, эм нэг талдаа өвчин эдгээх ч нөгөө талдаа хор байдаг. Тиймээс хуурамч, чанаргүй, баталгаагүй эм хүний эрүүл мэндийг яаж хохироодогт анхаарал хандуулах ёстойг гишүүд хэлж байлаа. Аль ч улсад чанаргүй, баталгаагүй, хуурамч эмйн зах зээл байдаг. Тиймээс иргэд эм эсвэл хор ууж байна уу гэдэгт хяналт тавьж, хариуцлагыг чангатгах хэрэгтэй гэдгийг гишүүд сануулав. Ингээд байнгын хорооны  гишүүдийн олонхи нь Засгийн газраас өргөн барьсан "Эмийн талаар төрөөс баримтлах бодлого батлах тухай" УИХ-ын тогтоолын төслийг хэлэлцэх нь зүйтэй гэж үзсэн учраас чуулганы хуралдаанд шилжүүллээ.