Улаанбаатар хотын Захирагчийн ажлын албанаас иргэдийн дунд явуулсан хогны ногоон уутыг цаашид үргэлжлүүлэн тараах эсэх асуудлаарх санал асуулгын дүнг танилцууллаа. Өнгөрсөн бямба гаригт /IV.19/ явуулсан санал асуулгад нийслэлийн 34 мянган өрхийг хамруулсан бөгөөд тэднээс цаасан хэлбэрээр санал авсан юм. Санал асуулгын дүнд иргэдийн 60,4 хувь нь хогны ногоон уутыг үргэлжлүүлэн тараахыг дэмжиж, үлдсэн 39,6 хувь нь татгалзсан байна.

Санал асуулгад оролцсон өрхийг дүүргээр ангилбал, Сонгинохайрхан дүүргийн 7855, Чингэлтэй дүүргийн 4249, Баянгол дүүргийн 5648, Баянзүрх дүүргийн 7001, Сүхбаатар дүүргийн 4920, Хан-Уул дүүргийн 2859, Багануур дүүргийн 732, Багахангай дүүргийн 293, Налайх дүүргийн 1050 өрх хамрагджээ. Эдгээрээс 57,2 хувь нь гэр хороололд, 42,3 хувь орон сууцанд амьдардаг байна.

Сануулахад, нэг өрхөд сарын хугацаанд 15 ширхэг хогны уут үнэгүй тараадаг бөгөөд үүнд нийслэлийн төсвөөс жилд 3,5 тэрбум төгрөг зарцуулж байгаа билээ.