Хууль зүйн сайд Х.Тэмүүжинг огцруулах эсэх асуудлыг УИХ-ын Хууль зүйн байнгын хороо өнгөрсөн долоо хоногт хэлэлцээд “Хуулийн байгууллагуудаас шаардлагатай мэдээллүүдийг авч танилцах хүртэл” уг хэлэлцүүлгийг хойшлуулахаар болсон билээ. О.Баасанхүү гишүүн Хууль зүйн сайдыг огцруулах үндэслэлдээ “хар тамхины бүлэглэлтэй холбоотой, мөн энэ хэрэгт шалгагдаж байгаа С гэгч бүсгүйтэй хувийн харилцаатай учраас Хууль зүйн сайд байх ёс суртахууны эрхгүй” гэсэн билээ. Харин Х.Тэмүүжин сайдын хувьд энэ тухай цагдаагийн байгууллагын зарим албан тушаалтнууд өөр дээр нь хууль зөрчин “гүйцэтгэх ажил” явуулсан, гэмт хэрэгт гүтгэсэн хэмээн мэдэгдээд байгаа билээ. Тиймээс уг хэргийг шалгуулахаар прокурорын байгууллагад гомдол гаргасан нь одоо ТЕГ луу шилжээд шалгагдаж байгаа юм байна. ТЕГ уг асуудлыг хуульд заасан хугацаанд шалгаж нягтлан УИХ-ын Халдашгүй байдлын дэд хороонд мэдээлллээ ирүүлсний дараа Хууль зүйн байнгын хороо Х.Тэмүүжин сайдыг огцруулах эсэх асуудлыг хэлэлцэх ёстой.

Гэвч өнөөдөр хуралдсан Хууль зүйн байнгын хорооны хуралдаан дээр УИХ-ын гишүүн О.Баасанхүү мөн л “Х.Тэмүүжинг огцруулах асуудлыг хэлэлцүүлсэнгүй” хэмээн угаасаа хэлэлцэх асуудлын хуваарьт ороогүй асуудлаар дахин маргаан дэгдээжээ. Харин энэ үеэр Х.Тэмүүжин гишүүн биеэ барьж тэсэлгүй “Чи үүнээс хойш өөрийгөө хуульч, өмгөөлөгч гэж битгий яриарай. Өөрийнхөө өчүүхэн жижиг ашиг сонирхлын төлөө бусдын нэр төрийг юман чинээ тоохгүй уландаа гишгэж явдаг чам шиг юм хуульчийн нэр барихгүй шүү. Цагдаагийнхан чамд тийм үнэтэй сайхан мэдээлэл өгчихсөн гэж бодож байна уу. Харин чи үүгээрээ хүн гүтгэсэн гэмт хэргийн хамтрагч л болно шүү” хэмээн сүрдүүлсэн байна.

Х.Тэмүүжин сайдын хувьд прокурорын байгууллагад, нэгдүгээрт цагдаагийн байгууллагын нэрийн өмнөөс хууль зөрчиж гүйцэтгэх ажил явуулсан, хоёрдугаарт тэнд авагдсан, эсвэл зохиосон байж болох мэдээллийг ашиглан бусдыг гүтгэсэн гэдэг гомдол гаргаад байгаа билээ. Хэрвээ энэ нь нотогдох юм бол нэлээн хэдэн хүн гүйцэтгэх ажиллагааны хууль тогтоомж зөрчсөн, санаатайгаар бусдыг гүтгэсэн хэргээр эрүүгийн ял зэмд унах болно гэсэн үг. О.Баасанхүү гишүүний хувьд эдгээр гэмт хэргийн “хам хэрэгтэн” болчихгүйн тулд одооноос хэлэх үгээ бодож явах цаг ирсэн бололтой.