Хаврын тариалалтыг энэ жил тавдугаар сарын 1-25-нд зохион байгуулах талаар Үйлдвэр, хөдөө аж ахуйн сайд Х.Баттулга хэллээ. Мөн тариалангийн гол аймгуудад хаврын тариалалтын зөвлөгөөнүүдийг хуваарийн дагуу дөрөвдүгээр сард явуулж дуусгах юм байна. Зөвлөгөөнөөр дулааны улирлын уур амьсгалын төлөв байдал, техник технологийн шинэчлэл нэвтрүүлэлт зэрэгтэй уялдуулан тариалангийн бүсүүдэд баримтлах технологийн зөвлөгөөг эрдэм шинжилгээний байгууллага, салбарын мэргэжилтнүүдийн зөвлөгөө, тэргүүний тариаланчдын туршлагад тулгуурлан боловсруулж тариаланчдад хүргүүлж эхэлжээ. 

Үйлдвэр хөдөө аж ахуйн яамнаас энэ онд 373.5 мянган га-д тариалалт хийж, улаанбуудай 426.4 мянган тонн, төмс 198.1 мянган тонн, хүнсний ногоо 106.8 мянган тонн, малын тэжээл 25.9  мянган тонныг  хураан авах зорилготой байгаа аж.