УИХ-ын Аюулгүй байдал, гадаад бодлогын байнгын хорооны хуралдаан 13.00 цагт эхэлж, ажлын хэсэг байгуулах тухай асуудлыг хэлэлцлээ. Мөн хуралдаанаар үеэр УИХ-ын гишүүн Сү.Батболд Монгол Улсын Ерөнхийлөгчөөс  өргөн мэдүүлсэн гадаадын зарим оронд суух Элчин сайд нарыг томилох тухай асуудлыг хэлэлцэх асуудлын дараалалд оруулж хэлэлцүүлэх санал гаргасныг хуралдаанд оролцсон гишүүдийнх олонхи дэмжсэнээр байнгын хорооны өнөөдрийн хуралдаанаар хоёр үндсэн асуудлыг хэлэлцэхээр боллоо.

Байнгын хорооны хуралдаанаар эхлээд ажлын хэсэг байгуулах тухай тогтоолын төслийг хэлэлцсэн юм.  Өмнөх байнгын хорооны хуралдааны үеэр гишүүдээс гаргасан саналын дагуу гадаад харилцааны салбарын бодлогын барим бичгийн хэрэгжилт, гадаад бодлогын асуудлаар шийдвэр гаргах механизмыг боловсонгуй болгох, хариуцлагажуулах байдалд дүгнэлт хийж, санал дүгнэлтээ байнгын хорооны хуралдаанд танилцуулах үүрэг бүхий ажлын хэсэг байгуулах тухай тогтоолын төслийг ажлын хэсэг боловсруулжээ. Тогтоолын төсөл болон ажлын хэсгийн удирдамжийн төсөлтэй холбогдуулан байнгын хорооны гишүүн М.Батчимэг "Энэ асуудлыг хаалттай хэлэлцэх" горимын санал гаргасны дагуу Аюулгүй байдал, гадаад бодлогын байнгын хороо хаалттай горимд шилжлээ.