“Реал Мадрид” багийн дасгалжуулагч Карло Анчелотти өнөө шөнө 03:30 цагаас /Улаанбаатарын цагаар/ болох Испанийн эзэн хааны цомын шигшээ тоглолтын өмнө “Манай багийнхан довтолж тоглох болно” гэжээ. Эзэн хааны цомын шигшээ тоглолтод Испанийн хамгийн агуу түүхтэй багууд “Реал Мадрид” болон “Барселона” тоглоно. Энэ хоёр багийн тоглолтыг дэлхий даяар “Эл класико” гэж нэрлэдэг билээ. Испанийн олонх үндэстнийг төлөөлөн “Реал Мадрид”, цөөн үндэстний нэг болох Каталончуудын бахархал “Барселона” багийн хоорондын тоглолт үзэл суртал, улстөрийн томоохон “тулаан” болдог юм.

Тоглолтын өмнө Испанийн эзэн хааны гэж нэрлэдэг “Реал Мадрид” багийн дасгалжуулагч Карло Анчелотти:

-Би одоохондоо гарааны 11 тоглогчоо сонгоогүй байна. Мэдээж манай багийн лидер Криштиан Роналду үгүйлэгдэнэ. Гэхдээ түүнийг орлох хэмжээний сайн тоглогчид бий. “Барселона” багт боломж олгохгүй, довтолж тоглох болно гэжээ. Өрсөлдөгч “Барселона” багийн хувьд сүүлийн хоёр тоглолтдоо дараалан хожигдоод байна. Мөн Европын хөлбөмбөгийн холбооны хамгийн нэр хүндтэй тэмцээний нэг “Аваргуудын лиг”-ээс хасагдсан юм.

Тоглолтын өмнөх хэвлэлийн хурал дээр “Барселона” багийн дасгалжуулагч Херардо Мартино:

-Эзэн хааны цомд амжилт гаргалаа гэхэд “Аваргуудын лиг”-т үзүүлсэн тааруу тоглолт мартагдахгүй. Гэхдээ хоорондоо адилгүй тэмцээнүүдийг хольж хутгамааргүй байна. Эзэн хааны цомын тэмцээнд түрүүлэхийн тулд бүхнээ хийх болно гэжээ.  

Өнөө шөнө болох тоглолтод “Реал Мадрид” багаас Криштиан Роналду гэмтлийн улмаас оролцохгүй нь тодорхой болсон. Харин өрсөлдөгч “Барселона” багаас төвийн хамгаалагч Жерард Пике, Карлос Пуойль, Марк Бартра нар гэмтлийн улмаас тоглолтод оролцох эсэх нь тун тодорхойгүй байна. Хэрвээ Пике, Пуойль, Бартра тоглохгүй бол “Барселона” гараандаа үндсэн төвийн хамгаалагчгүй тоглоно. Харин “Реал Мадрид” довтолж тоглоно гэдгээ мэдэгдсэн. Тиймээсс тун сонирхолтой тоглолт болох нь.