Болгар улсын нийслэл Софи хотноо болж буй сонирхогчийн боксын залуучуудын дэлхийн аварга шалгаруулах тэмцээний эрэгтэйчүүдийн 49 кг-ын жинд Бат-Очирын Төмөрхуяг, 52 кг-ын жинд Ганболдын Баттамир нар өрсөлдөгчөө яллаа. 2014 оны залуучуудын ДАШТ дөрөвдүгээр сарын 14-нд буюу өчигдөр нээлтээ хийсэн юм. Манай улсаас эрэгтэй долоо, эмэгтэй гурван жинд арван тамирчин өрсөлдөх юм. Тэмцээнийг монголын баг тун давгүй эхлүүлж хоёр тамирчин өрсөлдөгчөө яллаа.

Эрэгтэйчүүдийн 49 кг-ын жинд өрсөлдөж буй  Б.Төмөрхуяг эхний тоглолтдоо Өмнөд Африкийн боксчин Эдвин Тшабалалатай хийж, гурван үед илүүрхэн яллаа.

Харин 52 кг-ын жинд Г.Баттамир БНСУ-ын Хан Ёнхунтай тоглож, мөн л 3:0-ийн харьцаатай ялсан байна. Манай тамирчдын амжилтыг олон улсын боксын холбооны aiba.org  сайтад “Тоглолтын эхний өдөр: Төгс Монголчууд” гэж онцлон бичлээ. Учир нь Б.Төмөрхуяг, Г.Баттамир нар өрсөлдөгчдөө ямар ч боломж олголгүй илүүрхэн хожсон юм.

ДАШТ-д өрсөлдөж буй Монголын багийн бүрэлдэхүүн:

• Төмөрхуяг /49 кг/
• Баттамир /52 кг/
• Цэндбаатар /56 кг/
• Төрмандах /60 кг/
• Далай /64 кг/
• Нямдорж /69 кг/
• Цэнгүүн /75 кг/
• Нандинсувд /эм 51 кг/
• Үүрийнтуяа /эм 60 кг/
• Эрдэнэтуяа /эм 75 кг/

Албаны хүмүүс:

• П.Сэрдамба /Гавьяат тамирчин, холбооны ЕНБД/
• Д.Дарь.Сүхбаатар /МБХ-ны Дэд ерөнхийлөгч /Багийн ахлагч/
• Н.Мөнхсайхан /Залуучуудын шигшээ багийн дасгалжуулагч/
• Л.Энхбаатар /Дасгалжуулагч/
• Г.Ганхуяг /Дасгалжуулагч/

Сонирхогчдын боксын залуучуудын ДАШТ дөрөвдүгээр сарын 24-нд өндөрлөнө.