Нийслэлийн Засаг дарга Э.Бат-Үүл Эдийн засгийн хөгжлийн яамны харъяа “Гудамж” төслийн албан тушаалтнуудад хариуцлага тооцох санал гаргажээ. Учир нь “Гудамж” төслийнхний захиалгаар бариулсан Улсын Их дэлгүүрээс “АСА” цирк орох зам дагуу байрлуулсан гэрэлтүүлгийн шон суурийг хийхгүйгээр байрлуулснаас энэ сарын 13-нд унасан. Энэ нь иргэдийн эрүүл, аюулгүй орчинд амьдрах эрхийг зөрчсөн асуудал гэж нийслэлийн удирдлагууд үзэж байгаа юм. 

Энэхүү шонг Эдийн засгийн хөгжлийн яамны Гудамж төслийн захиалгаар “Велдедлайне Монголиа” ХХК хийж гүйцэтгэсэн байна. Шон унасан шалтгааныг “Велдедлайне Монголиа” ХХК-ийн төлөөлөгч Г.Бавуудорж “Уг ажлыг хүйтний улиралд хийж гүйцэтгэсэн. Гэрэлтүүлгийн шонгийн суурийг хийхгүйгээр байрлуулсан нь үнэн” гэж тайлбарлажээ.

Харин хүлээн авсан цахилгааны инженер А.Ермек “Гэрэлтүүлгийн шонг шууд газартай нь бэхэлж байрлуулсныг ажил хүлээн авахдаа мэдэж байсан” гэжээ.

Иймээс  уг ажлыг  хийж гүйцэтгэсэн компани, хүлээн авсан албаны хүнд хариуцлага тооцох саналыг Эдийн засгийн хөгжлийн яамд хүргүүллээ.