УИХ дахь бие даагчдын зөвлөлөөс энэ долоо хоногт УИХ болон байнгын хороодоор хэлэлцэх асуудлаар байр сууриа илэрхийллээ. УИХ, Засгийн газрын гишүүдийн "давхар дээлийг" тайлах асуудлыг энэ долоо хоногийн чуулганы хуралдаанаар хэлэлцэнэ. Энэ талаар УИХ дахь бие даагчдын зөвлөлийн гишүүн Ц.Даваасүрэн "Зөвхөн УИХ болон Засгийн газрын тухай хуулийг өөрчлөх нь хангалтгүй. Үндсэн хуульд нь УИХ-ын гишүүн Монгол улсын ерөнхий сайд Засгийн газрын гишүүнээр ажиллаж болно гэсэн заалтыг үлдээж байна. Тэгэхээр нэг ёсондоо үүнийг өөрчилсөн болж ард түмний нүдийг хуурах гэж байна” хэмээсэн юм. Давхар дээлийг тайлах гэж байгаа бол гуравны нэг нь, тавин хувь нь байж болно гэсэн асуудлыг үлдээж болохгүй. Өмнө нь Үндсэн хуульд байсан УИХ-ын гишүүн Засгийн газрын гишүүн байж болохгүй гэсэн заалтыг л сэргээх ёстой. Тэгэхээр процессын хуулийг биш гол нь Үндсэн хуулиа л өөрчлөх ёстой гэж бие даагч гишүүд үзэж буй юм байна.

Энэ долоо хоногт мөн УИХ-ын байнгын хороогоор Хотыг дахин хөгжүүлэх тухай хуулийн төслийг хэлэлцэнэ. УИХ-ын гишүүн Х.Болорчулуун "Энэ хуулийг зайлшгүй хэрэгжих цаг нь болсон хэмээн үзэж байгаа. Улаанбаатар хотод жилдээ 30 гаруй мянган иргэн нэмэгдэж байна. Нийслэлийн иргэд өнөөдөр эрүүл аюулгүй орчинд амьдрах боломжгүй болж байна. Улаанбаатар хот дэлхийн бохирдол ихтэй хотуудын жагсаалтын хоёрдугаарт  жагсч байна. Тиймээс Хотыг дахин хөгжүүлэх тухай хууль гарах зайлшгүй шаардлага байгаа юм" гэлээ.

Мөн С.Ганбаатар гишүүн Бие даагчдын зөвлөлөөс өргөн барьсан Компанийн тухай хуулийн талаар саналаа хэллээ.Түүний хэлснээр Компанийн тухай хуулийн мөн чанар нь жижиг хувьцаа эзэмшигчдийн эрх ашгийг хамгаалах нэрийдлээр гадаадын санхүүгийн болон банкны байгууллагууд орж ирж манай  хувьцаат үйлдвэрийн газруудыг бүгдийг нь луйвардсан 24 жилийн түүхийг таслан зогсооход чиглэсэн гэлээ. Өөрөөр хэлбэл луйврын үйл ажиллагаа явуулдаг хуулийн цоорхойг зогсоох ёстой гэж үзэж хуулийн төслийг өргөн барьсан гэлээ.