Сүүлийн жилүүдэд хурдацтай хөгжиж байгаа салбарын нэг барилга. Улаанбаатар хотын хэмжээнд жилдээ 30 мянга гаруй айлын орон сууц ашиглалтад орж байгаа нь яах аргагүй барилгачдын нөр их хөдөлмөрийн үр дүн гэлтэй. Гэвч компаниуд үйл ажиллагаа эрхлэх хүрээндээ хөдөлмөр аюулгүй байдлыг хангаж ажиллах талд учир дутагдалтай байгаа нь тус салбарт ажиллагсад эрүүл мэндээрээ хохирох эрсдэлтэйгээс гадна жирийн иргэн түүнд нь өртөж амь эрсдэх харамсалтай тохиолдлууд гарч буй. Тэгвэл энэхүү эрсдлийг бууруулахад хөдөлмөр аюулгүй байдлыг хангаж хэвших нь чухал байна гэдгийг "Барилгын салбарын хөдөлмөрийн аюулгүй байдал, эрүүл ахуйн хяналтын тогтолцооны шинэчлэл" сэдэвт зөвлөгөөнд оролцогчид онцолж байна. Мөн зөвлөгөөнд оролцогчид хөдөлмөр аюулгүй байдлыг хангаж ажиллаж байгаа бусад компаниудынхаа арга туршлагаас хуваалцаж байна.
Барилга барьж байгаа бол тэр дундаа 1.5 метрээс дээш өндөрт ажил хийж байгаа бол заавал хамгаалах бүс зүүх, уг бүс нь хоёр аргамжаатай байх ёстой аж. Мөн хамгаалалтын бүрэн хувцас хэрэглэл өмсөж хэвших нь чухал. Эрсдэлд ороход хамгаалах хувцас хэрэглэл тодорхой хэмжээгээр хамгаалдаг. Мөн хамгаалах хувцас өмссөн байтал эрсдэлд орж осолдсон бол юунаас болсон бэ гэдгийг тогтоохоор мэргэжлийн байгууллагууд ажилладаг. Магадгүй хувцас хэрэглэл шаардлага хангаагүй байсан тохиолдол гарвал эргээд хувцас хэрэглэл худалдан авсан компанидаа хандана. Тус компанийн нийлүүлж байгаа хамгаалах хувцас бүр өөрийн кодтой байдаг тул энэ бүхнийг барилгын компаниуд нягтлан шалгаж байх ёстойг тэд хэлж байна.
Статистик мэдээллээр сүүлийн есөн жилийн хугацаанд тус салбарт 581 удаагийн үйлдвэрлэлийн осол гарч, 246 иргэн амь насаа алджээ. Тухайлбал, 2013 онд барилгын салбарт гарсан үйлдвэрлэлийн ослын мэдээг харьцуулж үзвэл 69 удаагийн үйлдвэрлэлийн осол гарч, 28 хүн ослоос үүдэн нас баржээ. Тиймээс Мэргэжлийн хяналтын газраас үйлдвэрлэлийн ослыг бууруулах зорилгоор барилгын компаниудад хөдөлмөр аюулгүй байдлыг хангаж хэвшүүлэх шалгалт хийж буй аж.
"Барилгын салбарын хөдөлмөрийн аюулгүй байдал, эрүүл ахуйн хяналтын тогтолцооны шинэчлэл" сэдэвт зөвлөгөөн Төрийн ордонд болж байгаа юм. Тус арга хэмжээг Барилга хот байгуулалтын яам, Хөдөлмөрийн яам, Мэргэжлийн хяналтын ерөнхий газар, Монголын Барилгачдын холбоо, Монголын Ажил олгогч эздийн нэгдсэн холбоо, Барилгын хөгжлийн төв хамтран зохион байгуулж байна.
Г.ДАРЬ