УИХ дахь МАХН-МҮАН-ын "Шудрага ёс" эвслийн бүлэг өчигдөр хуралдаж, дөрвөн асуудал хэлэлцсэн талаар өнөөдөр мэдээлэл хийлээ. Улс орны эдийн засгийн өнөөгийн нөхцөл байдалтай холбогдуулан Ерөнхий сайд Н.Алтанхуяг, "Монгол банк"-ны ерөнхийлөгч Х.Золжаргал, Уул уурхайн сайд Д.Ганхуяг, Эдийн засгийн хөгжлийн сайд Н.Батбаяр нараас мэдээлэл сонссон байна. "Шудрага ёс" эвслийн бүлгээс эдийн засаг  хямарсан гэж дүгнэж байгаа учраас Засгийн газарт үүрэг чиглэл өгч, яаралтай арга хэмжээ авахыг даалгасан байна. Мөн тус бүлгийн хуралдаанаар  эдийн засагт үнэлэлт, дүгнэлт өгсөн байр сууриа маргааш албан бичгээр гаргаж хэвлэлээр дамжуулан олон нийтэд хүргэхээр болсон гэж тус бүлгийн дарга Н.Батцэрэг онцолсон.  

Мөн “Оюутолгой”-н далд уурхайн санхүүжилттэй холбоотой асуудлаар бүлгийн гишүүд санал бодлоо илэрхийлжээ. Энэ асуудалд Засгийн газар  нягт, хянамгай хандах ёстой гэж тус бүлгээс үзсэн бөгөөд "Шудрага ёс" эвслийн бүлгийн гишүүд ойрын хугацаанд “Оюутолгой” уурхайд өөрсдийн биеэр ажиллахаар болсон байна. Бүлгийн хуралдаанаар хэлэлцсэн бас нэгэн асуудал нь "Давхар дээл"-ийг дан болгох хуулийн төсөл аж. "Шудрага ёс" эвслийн бүлгийн зүгээс Ерөнхийлөгчийн санаачилсан уг хуулийн төслийг дэмжинэ гэдэг байр сууринд дахин нэгдсэн байна. Энэ хуулийг хэлэлцэж, батлах ёстой гэж бүлгийн гишүүд үзжээ. Үүнээс гадна УИХ-ын гишүүн О.Баасанхүү Хууль зүйн сайд Х.Тэмүүжинг огцруулах тогтоолын төслийг энэ долоо хоногт өргөн барьсан. Уг асуудлаар маргааш "Шудрага ёс" эвслийн бүлэг хуралдаж, тодорхой шийдвэр гаргахаар болжээ.