Apple компанийн iPhone-ийн шинэ загвар болох iPhone 6 ухаалаг гар утасны үйлдвэрлэлийг эхлүүлж, энэ оны намраас худалдаанд гаргахаар зэхэж байгаа талаар “Daily Mail” сайт мэдээлжээ.

Шинэ загварын дэлгэцийг Японы “Japan Display”, “Sharp” корпораци болон БНСУ-ын “LG Display” компаниуд хийхээр болжээ.

БНХАУ-ын нийгмийн сүлжээний “Weibo” сайтаар тархсан “iPhone 6” гар утасны хөгжүүлэлтийн зургуудыг “Apple”-ийн нийлүүлэгч “Foxconn Technologies”-ээс алдагдсан байж магадгүй гэж үзэж байна.

Тус загварууд нь хоёул урьд өмнөх загваруудаасаа илүү том хэмжээтэй буюу нэг нь 4.7 инч нөгөө нь 5.5 инчийн дэлгэцтэй байх хэдий ч хоёул нэгэн зэрэг худалдаанд гарахгүй юм байна. Түүнчлэн 4.7 инчтэй iPhone 6-ийн пиксел нөгөө загвараасаа бага байж магадгүй бөгөөд эдгээр том хэмжээтэй загварууд нь стандарт хэмжээтэй загваруудаасаа илүү үнэтэй худалдаалагдаж магадгүй юм байна.