Гэрэл зурагчин А.Түмэнжаргалын Төвд орны тухай гэрэл зургийн үзэсгэлэн өнгөрсөн сард Уран зургийн галлерейд гурван өдрийн турш гарсан билээ. Энэхүү үзэсгэлэнгээрээ Төвдөөр хийсэн аяллынхаа болон Монголын үзэсгэлэнт байгаль, аж байдлын тухай 100 шилдэг зургаа тэрээр дэлгэн үзүүлсэн юм. 

Харин энэхүү гэрэл зургийн үзэсгэлэнгээ үзэгчдийн хүсэлтээр худалдаа хэлбэрээр нэмж баяжуулан “BlueMon” цамхагт энэ сарын 7-ноос 17-ны хооронд дахин толилуулахаар болжээ. Энэ удаагийнх нь Монголын тухай зураг түлхүү орж байгаагаараа онцлогтой ажээ. Мэргэжлийн гэрэл зурагчид болон сонирхогчдын дунд Alеx нэрээр танил болсон А.Түмэнжаргал БНХАУ-ын Тенжин хотод хоёр удаа үзэсгэлэнгээ гаргаж, “Wonders of Mongolia”, “Inspiring Mongolia”, “Savage garden”, “Ариун орноор Төвд” нийт дөрвөн зургийн цомог эрхлэн гаргасан уран бүтээлч юм.