Шинжлэх Ухаан, Технологийн Их Сургуулийн Ректор Б.Очирбатын  2014 оны гуравдугаар сарын 25-ны өдрийн А-51 тушаалаар “Скайтел” Группын Гүйцэтгэх Захирал Д.Болорт тус сургуулийн “ХҮНДЭТ ПРОФЕССОР” цол олгохоор шийдвэрлэн, цол олгох ёслолын ажиллагаа 2014 оны гуравдугаар сарын 27-ны өдөр ШУТИС-ийн эрдмийн зөвлөлийн танхимд боллоо. Д.Болор нь 1983 оноос Харилцаа холбоо, мэдээллийн технологийн салбарт жирийн инженерээс компаний гүйцэтгэх захирал хүртэлх ажлуудыг 30 гаруй жил тасралтгүй, үр бүтээлтэй гүйцэтгэж байна. Тэрээр Монгол улсын мэдээлэл харилцаа холбооны салбарт шинэ дэвшилтэт технологи болон менежментийн шилдэг арга барил, Олон улсын Чанарын стандарт, Төгөлдөршлийн загваруудыг амжилттай нэвтрүүлж, холбооны үйлчилгээг өргөтгөх, чанарыг дээшлүүлэх, тус салбарын мэргэжилтэн бэлтгэх ажилд онцгой идэвх санаачлага гарган, сургалтын ном, сурах бичиг, лаборатори, материаллаг баазыг бэхжүүлэхэд оруулж буй үнэтэй хувь нэмрийг нь үнэлж, Монгол Улсын Шинжлэх Ухаан Технологийн Их Сургуулийн ХҮНДЭТ ПРОФЕССОР цол олгожээ.