Дэлхийн номер нэг теннисчин Испанийн Рафаэль Надаль 2008 оны “Уимбльдон” тэмцээний финалд Рожер Федерерийг ялж, аваргын цом хүртсэнээс хойш анх удаагаа Британийн нээлттэй тэмцээний талбайд гарч, энэ жилийн эхний өрсөлдөгч болох Японы Кей Нишикориг буулган авсан байна. Өнгөрсөн жил гэмтлийн улмаас аваргаа хамгаалан тоглож чадаагүй Надаль энэ удаад Нишикоритой хоёр цаг гаруй өрсөлдөж, 6-2; 6-4; 6-4 харьцаагаар гурван сет дараалан хожжээ. Тэрбээр ялалтынхаа дараа “Төв коурт дээр эргэж ирэх үнэхээр онцгой байлаа” гэсэн байна.
Мөн энэ үеэр Британийн номер нэг Энди Муррей Чехийн тамирчин Ян Хаекийг 7-5; 6-1; 6-2-оор хожиж, тэмцээний хоёрдугаар тойрогт өрсөлдөх эрхтэй болсон байна. Тэрбээр дараагийн тойрогт Финляндын Яркко Ньеминен, Австрийн Стефан Кубек нарын ялагчтай тоглох юм.

Түүнчлэн Робин Содерлинг АНУ-ын Роберт Жинеприг 6-2; 6-2; 6-3-аар хжосон бол Испанийн Дэвид Феррер 6-4; 6-2; 6-3 харьцаагаар Германы Николас Кьеферийг тус тус буулган авч, дараагийн шатанд өрсөлдөх эрхээ авчээ.

12,5 сая фунт стерлингийн шагналын сантай, зүлгэн коурт дээрх “Уимбльдон” тэмцээн ирэх сарын 4-нд өндөрлөнө.

С.Цэлмэг