УИХ-ын гишүүн Я.Содбаатар, Д.Хаянхярваа нар өнөөдөр хүнс барааны "Бөмбөгөр" худалдааны төв, 100 айлын барилгын материалын захад худалдаа наймаа эрхэлж буй иргэдтэй уулзаж, санал бодлыг нь сонслоо. Худалдаа наймааны хөлд байнга шахуу дарагдаж байдаг "Бөмбөгөр" худалдааны төв өнөөдөр эл хульхан байна. Юанийн ханш өнгөрсөн оны гуравдугаар сард 225 төгрөг байсан бол өнөөдрийн байдлаар 292 төгрөгт хүрээд байна. Энэ нь урд хөршөөс бараа бүтээгдэхүүн татаж лангуу түрээслэн амьдралаа залгуулдаг иргэдийн худалдаа наймаанд сөргөөр нөлөөлж байгааг тэд ярьж байлаа. "Бараа зарагдахгүй учраас бөөгнөрч суугаад хууч хөөрч суух тохиолдол олон юм даа" гэж худалдагч н.Пүрэвдолгор ярьж байлаа. Энэ нь сүүлийн үед “Бөмбөгөр” худалдааны төвөөр үйлчлүүлдэг иргэдийн тоо буурч, худалдан авах чадвар эрс муудаж байгаатай холбоотой аж.

Гэр ахуйн бараа борлуулдаг иргэн н.Нямбаатарын хувьд сардаа хоёр, гурван удаа Хятад руу явж бараагаа татдаг байж. Гэтэл одоо сардаа ганцхан удаа, зарим үед бараг явж чадахгүйд хүрчээ. Тэрээр өдөрт 120-150 мянган төгрөгийн орлоготой ажилладаг байсан бол энэ жилээс өдөрт 60-70 мянга төгрөг олдог болсон гэнэ. Зөвхөн н.Нямбаатар ч гэлтгүй эндхийн худалдаа эрхлэгчдэд энэ нь нийтлэг үзэгдэл болжээ. "Өдөрт хоёр, гуравхан бараа зардаг, одоо ганцхан цамц зарчихаад л сууж байна. Амьдрал туйлын хүнд байна. Яаж хэлбэл тэр сайд, дарга нар бидний амьдралыг мэддэг болох юм, ёстой мэдэх юм алга. Долларын ханшийг дагаад юань ч огцом өсч байна. Гэтэл ханшийг бууруулах талаар юу ч хийхгүй юм" гэж худалдагч нар хэлж байлаа. Иргэдийн амьдрал, эрх баригчдын хэлж буй хоёр алд дэлэм зөрүүтэй байгааг ч энд таарсан иргэд сануулж, бодитой арга хэмжээ авахыг хүсч байв. 

Ерөнхийдөө тус төвийн худалдагчдын хэлж буйгаар өнгөрсөн жилийн сүүлээс эхлэн иргэдийн худалдан авах чадвар эрс муудсан гэнэ. "Бөмбөгөр" худалдааны төвд мах, махан бүтээгдэхүүн борлуулдаг иргэд сүүлийн саруудад махны олдоц ховордсоныг эрхэм түшээдэд дуулгасан. Энэ нь зүүн аймгуудад гарсан шүлхийгээс гадна хятадууд их хэмжээгээр мах бэлтгэж байгаатай шууд холбоотой гэнэ. Мөн нөөцийн махны чанар муу байгаад анхаарах шаардлагатай гэлээ. Ер нь 10-20 кг-аар нь мах авдаг хүн цөөрөөд, ганц хоёр кг-аар нь авах элбэг болсон гэв.

УИХ-ын гишүүн Я.Содбаатар, Д.Хаянхярваа нар дараа нь 100 айлын барилгын материалын "Оч" төвийн худалдаа эрхлэгчидтэй уулзлаа. Цаг агаар дулаарч буй энэ үед барилгын материалын эрэлт хэрэгцээ ихэсдэг ч энэ жил харьцангуй гүйлгээ, борлуулалт сул байна гэж бизнес эрхлэгчдийн дийлэнх нь хэлж байсан. Юанийн ханшийн өсөлт барилга материалын худалдаа эрхлэгчдэд ч мөн хохиролтой тусч байна. Тус төв орчмын долоон байшинг буулгаж газарт оруулах гэж байгаа аж. 100 айл орчмын барилгын материалын дэлгүүрүүдээс зөвхөн энэ хэсэг газрыг газарт оруулах гэж байгааг тэд эсэргүүцэж буйгаа илэрхийлж байв. Сүүлийн үед барилгын материалын захыг Налайх дүүрэг рүү нүүлгэн шилжүүлнэ гэж байгаа ч тэнд ажиллаж буй худалдаа эрхлэгчдийн санал бодлыг сонссоны үндсэн дээр асуудлыг шийдэх ёстойг тэд төр засагт гишүүдээр дамжуулан уламжилж байна. Иймд нийслэлээс гарч буй шийдвэрүүдэд ард иргэдийн санал бодлыг тусгахгүй, цомхон хүрээнд санал асуулга төдий аваад өнгөрдөгт шүүмжлэлтэй хандаж байна. "Өнгөрсөн жил Засгийн газраас үнэ тогтворжуулах хөтөлбөрийн хүрээнд барилгын материалын үнийг тогтворжуулахад тодорхой хэмжээний хөрөнгө мөнгө зарсан. Гэхдээ энэ хөнгөлөлтөд хэдхэн том компани хамрагдсан. Харин энэ чиглэлээр бизнес эрхэлдэг иргэд уг хөтөлбөрт хамрагдаж чаддаггүй" гэж бизнес эрхлэгчид ярьж байсан.

Барилгын материалын худалдаа эрхэлдэг хүмүүсийн дийлэнх нь олон жил энэ бизнесийг дагнан эрхэлж байгаа аж. Тэдний хувьд орон сууцны зээлд хамрагдах боломж муу, нийгмийн даатгалд хамрагдалт ч сайнгүй байгааг хэлж, хувиараа хөдөлмөр эрхэлж буй иргэдэд чиглэсэн тодорхой бодлого хэрэгжүүлэх цаг болсныг санууллаа.