Хуралдаа суудаггүй гишүүдийг толгой цохин “Хаа яваа болдоо тэр минь” гэж хэлүүлэх хүртлээ цууд гарсан УИХ-ын гишүүн Б.Наранхүү Дундговь аймгийг бужигнуулаад авсан тухай Засаг дарга С.Сүхбаатар хэвлэлд өгсөн ярилцлагадаа цухас дурдаад авчээ. Энэ тухай Засаг дарга С.Сүхбаатар “УИХ-ын гишүүн Б.Наранхүү Засаг даргын албан тушаалыг Ардчилсан намд өгчих гэж байсан. Тэгэхээр аймгийн Засаг даргыг суудлаас нь буулгахад тодорхой нөлөө үзүүлсэн байж таарна” гэж хэлжээ.

Эндээс харвал, Б.Наранхүү гишүүн хурлаа тасалж, төрийн ажлыг цалгардуулж явсны цаад учир нь Дундговь аймгийн Засаг даргыг өөрийн намаас томилуулчих “хор” найруулж явсантай нь холбоотой бололтой юм. Үндсэн ажлаа олигтойхон хийчихээд өөр бусад ажилд оролцвол “шинэков” гишүүний хувьд өөрт нь хэрэгтэй байлтай.

Харин Засаг дарга С.Сүхбаатарыг албан тушаалаас нь чөлөөлөхийн тулд Дундговь аймгийн ИТХ нь хуралдсан ч зөвхөн Ардчилсан намын бүлгийнхэн дангаараа хуралдаж шийдвэр гаргасан нь эргээд хууль зөрчсөн үйлдэл болж хувирсан байна. Тиймээс орон нутгийн сонгуульд МАН Дундговь аймагт ялсан эрхээ баталгаажуулж дахин С.Сүхбаатарыг Засаг даргаар томилуулжээ.