Европын хөлбөмбөгийн холбооны “Аваргуудын лиг”-ийн тэмцээний хасагдах шатны Английн “Челси” болон Туркийн “Галатасарай”, Испанийн “Реал Мадрид” болон Германы “Шальке04” багуудын шийдвэрлэх тоглолтууд өнөө шөнө 03:45 цагаас /Улаанбаатарын цагаар/ эхэлнэ.

Эдгээрээс Английн “Челси” Туркийн “Галатасарай” багийг талбайдаа хүлээн авах тоглолт хөлбөмбөгийн хорхойтнуудын анхаарлыг татаж байна. Хоёр багийн өмнөх тоглолт “Галатасарай” багийн талбайд болж, 1:1-ийн харьцаатай тэнцсэн юм. Айлын талбайд гоол оруулсан, өөрийн талбайдаа, үнэнч хөгжөөн дэмжигчдийнхээ өмнө тоглоно гэдэг утгаараа Английн “Челси”баг давуу талтай. Гэхдээ энэ тоглолтоос илүүтэй “Челси”-гийн домогт хөлбөмбөгч Дидие Дрогба төрөлх багийнхаа эсрэг, нэр цуурайтдаг байсан цэнгэлдэх “Стэмфорд Бриж”-дээ хэрхэн тоглох нь сонирхолтой.

Тоглолтын өмнө Дидие Дрогба тоглолтын талаар,

-“Стэмфорд Бриж” цэнгэлдэхэд эргэн ирж, танил царайтай хүмүүсээ харах болсондоо үнэхээр баяртай байна. Маш том тоглолт болно. Мэдээж хөгжөөн дэмжигчдээ хараад сэтгэл хөдөлнө.  “Челси” багийн эсрэг тоглох маш хүнд. Гэлээ ч энэ нь миний тоглолтод огтхон ч нөлөөлөхгүй. Би одоо “Галатасарай” багт хүчин зүтгэж байна. “Галатасарай” багтайгаа дараагийн шатад шалгарахыг хүсч байна гэж сэтгүүлчдэд ярьсан байна.

Харин “Челси” багийн дасгалжуулагч Жозе Моуриньо:

-Дрогба бол энэ цаг үеийн хамгийн шилдэг довтлогчийн нэг. Мөн манай багийн түүхэн дэх агуу тоглогчийн нэг. Тиймээс бид маш хянамгай тоглох ёстой. Түүнийг тоглолтын эцсийн минут хүртэл хараагаа салгалгүй хянамгай хамгаалж тоглох ёстой. “Галатасарай” багт Дидие Дрогбагаас гадна Уэсли Снэйдер гэж дэлхийн шилдэг хөлбөмбөгч байгааг бас мартах ёсгүй гэдгийг онцолжээ.

Дрогба “Челси” багийн төлөө:

Анхны тоглолт: 2004 оны наймдугаар сарын 15. “Манчестер Юнайтед” багийн эсрэг

Анхны гоол: 2004 оны наймдугаар сарын 24. “Кристаль Палас” багийн эсрэг

Тоглосон тоо: 342

Оруулсан гоол: 157

Дрогба “Челси” багийн хамт:

Английн “Премьер лиг”-ийн аварга: 2004-2005, 2005-2006, 2009-2010 оны улирал

Холбооны цом /FA cup/: 2006-2207, 2008-2009, 2009-2010, 2011-2012 оны улирал
 UEFA “Аваргуудын лиг”-ийн аварга: 2011-2012 оны улирал

“Премьер лиг”-ийн мэргэн бууч:  2007, 2010 он

Энэ тоглолттой зэрэгцэн Испанийн “Реал Мадрид” Германы “Шальке04” багийг талбайдаа хүлээн авна. Эхний тоглолт “Шальке04” багийн талбайд болж, “Реал Мадрид” 6:1-ийн харьцаатай хожсон. Өнөө шөнийн тоглолтод “Шальке04” “Реал Мадрид” багийг долоон гоолын зөрүүтэй хожиж дараагийн шатад шалгарна. Товчхондоо бол боломжгүй зүйл. Хүчирхэг “Реал Мадрид” баг хашир туршлагатай дасгалжуулагч Карло Анчелоттийн удирдлага дор “Сантиагу Бернабеу” цэнгэлдэхдээ 81 мянган хөгжөөн дэмжигчийнхээ өмнө долоон гоолын зөрүүтэй хожигдоно гэдэг юу л бол…