Засгийн газрын 11-11 төвд өнгөрсөн долоо хоногт экспортыг нэмэгдүүлэх, импортыг орлох үйлдвэрийн төслүүдийн шалгаруулалтын талаар болон санхүүжилт, зээлийн нөхцөлийн талаарх асуулт ихэвчлэн ирсэн байна. Төслүүдийн талаарх мэдээллийг хариуцаж буйн хувьд Хөгжлийн банк мэдээлэлд тодорхой хариулт өгсөн байна. Засгийн газраас нийт 1151 төслөөс эхний ээлжинд 888 төсөл шалгаруулаад байгаа бөгөөд цаашид үргэлжлүүлэн шалгаруулалт явуулж байгаа юм. Ирэх тавдугаар сарын 1 гэхэд эхний төсөлд санхүүжилтээ өгөх бөгөөд зээлийн хүүг есөн хувь хүртэл байхаар тооцоолж байгааг албаныхан хэлж буй.

Өнгөрсөн долоо хоногт 11-11  төвд нийт 890 иргэн хандсан байна. Эдгээр иргэдийн олонхи нь “Орон сууцны ипотекийн зээл” хөтөлбөрт амины орон сууцыг хамруулах талаар мэдээлэл авсан байна.  Энэхүү хөнгөлөлттэй зээлийн хүрээнд өөрийн эзэмшлийн газар болон өмчилж авсан газартаа амины тохилог орон сууц барих буюу худалдан авах хүсэлтэй иргэдэд зориулсан “Амины орон сууц” хөтөлбөрийн төслийг боловсруулан Засгийн газрын Хэрэг эрхлэх газарт хүргүүлсэн. Хөтөлбөр Засгийн газрын хуралдаанаар дэмжигдэн батлагдвал амины орон сууц барих болон худалдан авах иргэд хөнгөлөлттэй зээлд хамрагдах боломж бүрдэх юм байна.