Хятадын өмнөд хэсгийн Хунань мужийн Чанша хотын зах дээр өнөөдөр /III.14/ хутгатай халдлага гарч, таван хүн мэсний шархны улмаас, нэг хүн цагдаа нарын бууны суманд өртөн амь үрэгдсэн хэрэг гарлаа. Чанша хотын хэвлэлүүдэд мэдээлснээр зах дээр наймаачдийн хоорондох маргааны улмаас дээрх хэрэг гарсан гэнэ. Харин Хунань мужийн хэвлэлүүд маргаан наймаачин, худалдан авагч нарын хооронд гарсныг мэдээлжээ. Энэ үеэр хэргийн газраас зугтаасан нэг сэжигтэн цагдаа нарын бууны суманд оногдож амь үрэгдсэн бол өөр нэг сэжигтэн баривчлагдсан байна. Чанша хотын цагдаагийн газраас хэргийг мөрдөн шалгаж буй тул мэдээлэл өгөхөөс татгалзжээ. Түүнчлэн халдлагын үеэр баривчлагдсан сэжигтэн Лу овогтой гэхээс өөр мэдээлэл өгөөгүй байна.

Энэ нь гуравдугаар сард Хятадад гарсан хоёр дахь хутгатай халдлага юм. Өмнө нь энэ гуравдугаар сарын 1-нд Шинжаан-Уйгурт галт тэрэгний буудалд хутгатай халдлага гарснаар 29 хүн амь үрэгдсэн билээ. Хятадын эрх баригчдын зүгээс халдлагад салан тусгаарлах үзэлтэй уйгур үндэстнийг буруутгасан юм.

Түүнчлэн өнгөрсөн 2013 оны аравдугаар сард Хятадын нийслэл Бээжин хотын төв Тян Ань Миний талбайд автомашинтай этгээдүүд хүмүүсийг дайрч, осолдсон нь дэлхийг цочроосон билээ. Ослыг Хятадын эрх баригчид террорист халдлага хэмээн баталж, уйгуруудын хийсэн хэрэг гэж мэдэгдсэн юм. Үүний дараа Хятадын Засгийн газар исламын шашинт уйгур үндэстэн оршин суудаг баруун өмнөд хэсгийн Шинжаанд тавих хяналтаа чангатгах арга хэмжээ авсан. Гэвч Хятадад удаа дараалан гарч буй дээрх халдлагуудаас үзвэл Тян Ань Миний талбайд болсон халдлага уйгуруудыг улам өдөөсөн мэт санагдана.