“Сүүн бүтээгдэхүүн хэрэглэгчдийн төв” ТББ –аас өнөөдөр сүүний үйлдвэрүүдийн талаарх мэдээлэл хийлээ. Одоо үйлдвэрлэж, худалдаанд гаргаж буй сүүний үйлдвэрүүд бүтээгдэхүүний танилцуулга, хаяг, шошгоо буруу бичдэг нь хэрэглэгчдийг төөрөлдүүлдэг талаар энэ үеэр онцолсон юм. Энэ асуудалд Шударга өрсөлдөөн, хэрэглэгчийн төлөө газар, Мэргэжлийн хяналтын ерөнхий газар анхаарлаа хандуулж, хяналт шалгалт хийх ёстой ч тодорхой арга хэмжээ авч, асуудлыг шийдэж чадахгүй байгааг тус ТББ-ын тэргүүн Б.Цэрэн хэлсэн.

Засгийн газрын 2011 онд баталсан Сүү, сүүн бүтээгдэхүүний техникийн зохицуулалтыг мөрдөх  ёстой байтал энэ нь хэрэгжихгүй байгаа ажээ. Түүнчлэн Хүнсний болон Хүнсний аюулгүй байдлыг хангах тухай хуулийг хэрэгжүүлээд нэг жил болсон ч сүүн бүтээгдэхүүний чанарын шаардлага, орц, найрлагыг бүрэн мэдээллэхгүй хэвээр байна гэв. Тухайлбал, “Гоё” тараг нь  хүнсний нэмэлт, элсэн чихэр хольсон учраас тараг гэх нь зохисгүй бөгөөд ингэснээрээ иогурт болж байгаа тухай хурлын үеэр хэлсэн юм. Түүнчлэн гадуур худалдаж буй сүүг үнээний сүүнээс эсвэл хуурай сүүнээс гаргасан нь тодорхойгүй байдаг нь хэрэглэгчдийг төөрөгдүүлдэг учраас бүтээгдэхүүний танилцуулгыг үнэн зөв мэдээлж байхыг ийнхүү шаардаж байгаа ажээ.