Сураггүй болоод олон хонож буй Малайзын агаарын тээврийн 370-р нислэгт зорчигчдын гар утас холбогдож байгаа боловч хэн ч хариулахгүй байгааг гэр бүлийнхэн нь мэдээлжээ. Хятадын хэвлэлүүдэд мэдээлснээр “Boeing 777-200ER” онгоцонд зорчигчдын заримынх нь гар утас үе, үе холбогдож байгаа боловч хэн ч хариу өгөхгүй байгаа аж. 370-р нислэгтэй хамт ор сураггүй болсон Хятадын 153 зорчигчийн нэгнийх нь дүү Биан Лиангвейн мэдээлснээр тэрээр өчигдөр /III.11/ 11:40, 14:00 цагуудад ахынхаа гар утас руу залгатал холбогдсон боловч хэн ч аваагүй гэнэ. Түүнчлэн Бээжингээс өөр нэг эрэгтэй сураггүй болсон онгоцонд зорчигч руу гурван удаа залгаж үзэхэд холбогдсон боловч дуудлагыг нь хэн ч аваагүй хэмээн “Shanghai Daily”-д мэдээлжээ. Мөн сураггүй болсон онгоцны нислэгийн багийнхны гар утас нь ч холбогдож байгаа аж.

Үүний зэрэгцээ Хятадын 19 зорчигчийн гэр бүлийнхэн тэдний гар утас холбогдож буйг баталсан хамтарсан мэдэгдэлд гарын үсэг зурж, Малайзын агаарын тээврээс нууцалж буй мэдээллээ олон нийтэд ил болгохыг шаардсаныг “China.org.cn” мэдээлжээ.