Европын хөлбөмбөгийн холбооны “Аваргуудын лиг”-ийн хасагдах шатны Испанийн “Атлетико Мадрид” болон Италийн “АС Милан”, Германы “Байерн Мюнхен” болон Английн “Арсенал” багуудын шийдвэрлэх тоглолт өнөө шөнө Улаанбаатарын цагаар 03:45 цагаас эхэлнэ. Эдгээр багуудын эхний тоглолт өнгөрөгч хоёрдугаар сарын 20-нд болсон юм.

Германы “Байерн Мюнхен” Английн “Арсенал” багийг талбайдаа хүлээн авч тоглоно. “Байерн Мюнхен” өмнөх тоглолтод “Арсенал” багийг талбайд нь 2:0-ийн харьцаатай хожиж, давуу байдлыг бүрдүүлж чадсан.

Өнөөдрийн тоглолт Английн “Арсенал” багийн хувьд тун хэцүү байх нь тодорхой. Гэхдээ “Арсенал” өнгөрсөн жил “Байерн Мюнхен” багийг талбайд 2:0-ийн харьцаатай хожиж байсан удаатай.

Тоглолтын өмнө “Арсенал” багийн дасгалжуулагч Арсень Венгер:

-Бид “Байерн”-ийг хожиж чадна. Өмнө нь манай багийнхан “Байерн Мюнхен” багийг хожиж л байсан. Бид энэ тоглолтод довтлох ёстойгоо мэднэ. Бас хамгаалах ёстойгоо ч мэднэ. Хамгийн гол 11 тоглогчийн эсрэг 11-үүлээ тоглох шударга боломж олдоно гэж найдаж байна.

“Байерн Мюнхен” багийн дасгалжуулагч Хосеп Гуардиола:

-Өрсөлдөгчөө талбайд нь 2:0-ийн харьцаатай хожно гэдэг маш сайн үр дүн. Бидэнд дараагийн шатад шалгарах боломж байна. Гэхдээ аюул холдоогүй. “Аваргуудын лиг”-ийн тэмцээн бол Германы хөлбөмбөгийн аварга шалгаруулах тэмцээнээс огт өөр. Өнөөдөр яг л шигшээ тоглолт шиг ач холбогдол өгч тоглох ёстой. Хэрвээ бид “Арсенал” багт бөмбөг их өгвөл хожигдох болно гэжээ. 
  
Энэ тоглолттой зэрэгцэн Испанийн “Атлетико Мадрид” Италийн “АС Милан” багийн тоглолт болно. Өнөө шөнийн тоглолтод “Аваргуудын лиг”-ийн долоон удаагийн аварга “АС Милан” хожиж байж дараагийн шатад шалгарах хүндтэй даалгавартай. “Атлетико Мадрид” багийн хувьд 2013-2014 оны улиралд тун сайн тоглож, Испанийн хөлбөмбөгийн дээд лиг “Примера Дивисион”-д хоёрдугаар байрт бичигдэж байна. Харин “АС Милан” тун тааруухан улирлыг үдэж буй бөгөөд лигийнхээ аравдугаар байрт бичигдэж байгаа юм. 

Тоглолтын өмнө дасгалжуулагчид хэвлэлийн хурал дээр эсрэг багийнхаа талаар сэтгүүлчдэд ярилцлага өгсөн байна.

“Атлетико Мадрид” багийн дасгалжуулагч Диего Симеоне:

-Тоглолт хэрхэн өрнөхийг мэдэхгүй юм. “АС Милан” өнөөдөр гоол оруулахын төлөө тоглоно. Харин бидэнд эхний тоглолтын хожлын давуу тал бий. Тоглолтыг хяналтдаа авах нь чухал. Өмнөх тоглолтоос ялгаатай нь манай багийн бүрэлдэхүүнд өөрчлөлт орно. Диего Коста, Годин нар гэмтлээс эргэн ирсэн тул гараандаа тоглоно.

“АС Милан” багийн дасгалжуулагч Кларенс Зеедорф:

-“Атлетико” бол талбайд юу хийхээ мэддэг, тун авьяаслаг баг. Тэдэнд Диего Коста, Давид Вилья гээд дэлхийн хэмжээний хоёр довтлогч байна. Бид гоол оруулахын хичээж, эрч хүчтэй тоглох болно. Бид багаараа тэмцэж, бүх сэтгэл зүрхээ гарган тоглох ёстой гэдгийг онцолсон байна.