Яармагийн дэнжид баригдсан 567 айлын орон сууцны 1м2-ынх нь үнийг 1.280.000 төгрөг байхаар Засгийн газраас зарласан. Тэгвэл уг байранд орох иргэдийн захиалгыг өчигдрөөс ТҮЦ машинаар дамжуулан авч эхэлсэн билээ.  Улаанбаатар хотын хэмжээнд ТҮЦ машин 20 ширхэг байрлаж буй бөгөөд 24 цагийн турш ажиллах гэнэ. Харин захиалга өгөх иргэн иргэний үнэмлэхтэйгээ очиж, бүртгэлээ хийлгэнэ. Гол нь иргэд захиалгыг өгөхдөө бүртгэлээ үнэн зөв хийх ёстой. Хэрэв бүртгэлээ хуурамчаар өгсөн байвал хоёр дахь шатны шалгаруулалтын явцад энэ бүхэн нь илрэх аж.

Бүртгэл гуравдугаар сарын 24-ний 18.00 цаг хүртэл үргэлжлэх юм байна.

Захиалга өгөх иргэдэд дараах шаардлага тавьж байна.

• 2014 оны нэгдүгээр сарын 1-ний өдрийн байдлаар Улаанбаатар хотод байнга оршин суух хаягийн бүртгэлтэй Монгол Улсын иргэн байх

• Анх удаа орон сууц худалдан авч байгаа /Энэ заалтад 18 нас хүрэхээс өмнө гэр бүлийн гишүүдийн хамтран өмчлөх орон сууцанд бүртгэлтэй этгээдийг хамруулна/

• Төрийн болон аж ахуй нэгж, байгууллагад 2-оос доошгүй жил ажиллаж сүүлийн 2 жил нийгмийн даатгалын шимтгэлээ тасралтгүй төлсөн

• Банк санхүүгийн байгууллагад чанаргүй зээлийн өргүй байх

• Өмнө нь банк санхүүгийн байгууллагаас орон сууцны зээл авч байгаагүй байх

• Орон сууцны үнийн 30-аас доошгүй хувийг урьдчилж төлөх боломжтой байх

• Орон сууцны үлдэгдэл төлбөрийг төлөхөөр банкнаас зээл авахад банк санхүүгийн байгууллагаас холбогдох журмын дагуу зээлдэгчдэд тавигдах нөхцөл шалгуурыг хангасан байх гэсэн үндсэн шалгуур үзүүлэлтийг тавьжээ.

Мөн нэг анхаарах асуудал байгаа нь залуу гэр бүлийнхний нас 35-аас хэтэрсэн бол захиалга өгөх боломжгүй аж. Харин ахмад настан, хөгжлийн бэрхшээлтэй иргэд, төрийн албан хаагч нар орон сууцны захиалгад хамрагдаж болно. Ашиглалтад ороод байгаа орон сууцны 60 хувийг төрийн албан хаагчдад үлдэж буй 40 хувийг ахмад настан, хөгжлийн бэрхшээлтэй иргэд, залуу гэр бүлд хуваарилахаар журамд хатуу заасан юм.

Улаанбаатар хотод байгаа ТҮЦ машины байршил:

Баянзүрх дүүрэг	Хороо	Байршил
	14-р хороо	Сандэй худалдааны төв
	18-р хороо	Офицеруудын ордон
	23-р хороо	Хужирбулан /Дэлгүүр/
Баянгол дүүрэг	7-р хороо	Төв вокзал
Сонгинохайрхан дүүрэг	20-р хороо	Орбитын эцэс /дэлгүүр/
	11-р хороо	Хөтөлийн буудал /дэлгүүр/
	16-р хороо	32-ын буудал, Миний дэлгүүр
	31-р хороо	СХД-ийн 31-р хорооны байр
Сүхбаатар дүүрэг	12-р хороо	Мэдээлэл технологийн үндэсний парк
	1-р хороо	32-ын тойрог Номин худалдааны төв
		Төв шуудан
Хан-Уул дүүрэг	2-р хороо	Хан-Уул дүүргийн үйлчилгээний төв
	10-р хороо	Чингис хаан ОУНО буудал
	8-р хороо	Яармагийн дэнж /дэлгүүр/
Чингэлтэй дүүрэг	11-р хороо	17-ын дэлгүүр
	4-р хороо	Тэнгис кино театр
	18-р хороо	7 буудлын эцэс худалдааны төв