Беларус улс хоёр долоо хоногийн дотор Орос улсад байгалийн хий худалдаж авсныхаа төлбөрийг төлж дуусгана гэж мэдэгдлээ. Беларус улс Оросын төрийн өмчийн “Газпром” компаниас 200 орчим сая ам.долларын байгалийн хий авч хэрэглээд мөнгийг нь төлөөгүй байсан тул Беларуст нийлүүлэх байгалийн хийг бууруулах шийд өчигдөр ОХУ-ын Ерөнхийлөгч Дмитрий Медведев гаргасан юм.  Беларус улс ОХУ-д байгалийн хийн төлбөрийг төлөх өртэй гэдгээ мэдэж байгаагийн хамт Беларусын нутгаар хийн хоолой дамжуулсны төлбөрт ОХУ Беларуст 217 сая ам.долларын төлбөр төлөх ёстой байгаа талаар мөн мэдээлсэн байна. 2009 онд байгалийн хийтэй холбоотой маргаан Орос, Украйны хооронд гарч байсан бөгөөд “Газпром” хий нийлүүлэхээ зогсоосноос болж олон сая хүн хохирч байсан.

Беларус ойрын хугацаанд байгалийн хийний төлбөрөө өгнө гэж мэдэгдсэн. Гэхдээ “машин техник, тоног төхөөрөмж болон бусад бүтээгдэхүүнээр тооцоо хийх санал гаргасан” гэж “Газпром”ын ерөнхий захирал Алексей Миллер Медведев Ерөнхийлөгчид мэдэгдсэн байна.

Үүний хариуд Медведев Ерөнхийлөгч “Газпром” зөвхөн валютаар тооцоо хийх болно. Хоолой, тос, бяслаг өөр юу ч байсан өөр зүйлээр тооцоо хийхгүй” гэж хэлсэн байна. Үүний хариуд Беларусын тал “Хатуу валютаар тооцоо хийхэд бидэнд хүндрэлтэй. Гэхдээ бид энэ асуудлыг шийдэх арга замыг олж, зээл авах замаар тооцоо хийх болно” гэж мэдэгдсэн. Түүнийхээ хамт “төлбөрийн асуудлыг шийдэхийн хамт Орос улс Беларусаар хийн хоолой дайруулан гаргасныхаа төлбөрт 217 сая ам.доллар төлөх ёстой гэдгээ хүлээн зөвшөөрөх хэрэгтэй. Оросууд дайруулан гаргасны төлбөрөө хий, бид хий хэрэглэсний төлбөрөө хийнэ” гэж мэдэгдсэн байна.

Т.Бадрах