Канадын теннисчин Эжени Бушар BNP Paribas Open тэмцээний дөрөвдүгээр тойрогт шалгараад байна.

Нийт 6 сая ам.долларын шагналын сантай BNP Paribas Open тэмцээн АНУ-ын Индиан Уэллст болж байгаа бөгөөд эмэгтэйчүүдийн ганцаарчилсан төрлийн дөрөвдүгээр тойрогт өрсөлдөх теннисчид эхнээсээ тодроод байна. Тэмцээнд 19-д эрэмбэлэгдэн тоглож буй Канадын залуу теннисчин Эжени Бушар Италийн Сара Эрринаг/9/ нэг цаг 16 минут үргэлжилсэн тоглолтод 6:3, 6:3-ийн харьцаагаар буулган авснаар шөвгийн 16-д шалгарлаа. Тэрээр зургаад эрэмбэлэгдэн тоглож буй Симона Халептай 1/8-д өрсөлдөнө. Канадын залуу теннисчин Эжени Бушар энэ оны анхны “Их дуулга” болох “Австралийн нээлттэй тэмцээн”-ий хагас шигшээд Хятадын Ли Над ялагдсан билээ.

Польшийн Агненшка Радваньска, Францын Ализе Корнет болон тэмцээнд аравт эрэмбэлэгдсэн Данийн Возняцки нарын шилдгүүд шөвгийн 16-д шалгараад байна. Тэмцээнд дөрөвт эрэмбэлэгдэн тоглож буй ОХУ-ын Мария Шарапова Италийн Камила Гиоржитой, Словакийн Цибулкова ОХУ-ын Екатарина Макароватай оноолт таарсан бол Чехийн Квитова ОХУ-ын Кузнецова нарын шилдгүүд гуравдугаар тойрогт учраа таарчээ. Энэхүү тэмцээнийг АНУ-ын Серена Уильямс өнжсөн бөгөөд БНХАУ-ын Ли На тэргүүлэн тоглож байна. 

Өнөөдөр гуравдугаар тойргийн үлдсэн тоглолтууд болж, шөвгийн 16-н теннисчид бүрэн тодрох юм.

5 сая ам.долларын шагналын сантай BNP Paribas Open тэмцээний эрэгтэйчүүдийн ганцаарчилсан төрлийн гуравдугаар тойргийн тоглолтууд өндөрлөжээ. Тэмцээнд дөрөвт эрэмбэлэгдсэн Чехийн Томаш Бердых, Францын Жо Уильфред-Цонга /9/нарын шилдгүүд гуравдугаар тойрогт ялагдал хүлээсэн байна. Бусад шилдгүүдийн хувьд учраагаа буулган авснаар 1/32-т шалгараад байна.