АНУ тэргүүтэй Барууныхан ОХУ-ыг Украинд цэргийн түрэмгийлэл явуулж буйг буруутгаж буй билээ. Үүнтэй холбоотойгоор АНУ-ын шаргуу шаардлагын дагуу Европын холбооны Гадаад хэргийн сайд нар өнөөдөр /III.6/ ОХУ-ын эсрэг хориг тавих асуудлаар хуралдсан юм. Гэвч Брюссельд болсон уулзалтын үр дүнд ОХУ-ын эсрэг хориг тавилгүй, Крымээс цэргийн хүчээ эргүүлэн татахыг шаардан хатуу анхааруулга өгчээ. Ажиглагчдын зүгээс Европын холбооны орнууд ОХУ-аас байгалийн хийн импортоос шалтгаалан эдийн засгийн хориг тавьж төвдөхгүй хэмээн дүгнэж байсан нь ийнхүү батлагдлаа.

Үүний зэрэгцээ Франц улсын зүгээс ОХУ-д байлдааны хөлөг онгоцны худалдахаар төлөвлөснөө одоо болтол цуцлаагүй байгаа юм. Мөн Их Британи Лондоны банкны ОХУ-ын хөрөнгө оруулалтын хөнгөлөлтөөс хүртэж буй ашгаас, Герман компаниудынхаа ОХУ-д хийсэн 22 тэрбум ам.долларын хөрөнгө оруулалтаас шалтгаалан тус, тус хориг тавих саналыг дэмжээгүй байна. Харин АНУ-ын зүгээс ОХУ-ын эсрэг визний хориг, эрх баригчдын хөрөнгийг царцаах, худалдаа, наймааны харилцааг хязгаарлах гэх мэт хориг арга хэмжээ авахад бэлэн буйгаа мэдэгджээ.
Түүнчлэн ОХУ-ын Гадаад хэргийн сайд Сергей Лавров, АНУ-ын Төрийн нарийн бичгийн дарга Жон Керри нар Украины асуудлаар өнөөдөр Ромд дахин уулзаж буй аж.