АНУ-ын сагсан бөмбөгийн NBA-гийн “Атланта Хокс” багийн хамгаалагч Кайл Корверийн дараалан гурван онооны зайнаас амжилттай довтолсон дээд амжилт зогслоо. Кайл Корвер 127 тоглолт дараалан гурван онооны зайнаас амжилттай довтолсноор NBA-гийн дээд амжилтыг тогтоож, түүхэн сагсан бөмбөгч болсон юм. Өнөөдөр “Атланта Хокс”, “Портланд Трэйл Блэйзерс” багийн талбайд зочилсон тоглолтод Кайл Корвер таван удаа гурван онооны зайнаас шидсэн ч амжилтгүй болж, дээд амжилтын цувралаа зогсоолоо. Энэ тоглолтод “Портланд” “Атланта Хокс” багийг 102:78-ын харьцаатай хожсон юм.

“Портланд”-аас Николас Батум 14 оноо, 18 удаа самбараас бөмбөг авч багаа тэргүүлсэн байна. Өнөөдрийн тоглолтод “Портланд” багийнхан жигд сайн тоглож, гарааны тамирчид арваас дээш оноо авсан. Дамиан Лиллард 12 оноо, зургаан оновчтой дамжуулалт Уэсли Маттьюс арав, Ламаркус Алдриж 10 оноо, зургаан самбараас  бөмбөг авалт, сэлгээнээс Мо Уиллиамс 15 оноо гэх мэтчилэн тун жигд тоглосон.

Харин талбайн зочноор тоглож хожигдсон “Атланта Хокс”-ын сэлгээний тоглогч Картьер Мартин 16 оноо, зургаан удаа самбараас бөмбөг авч багаа тэргүүлжээ. Өнөөдрийн тоглолтод “Атланта Хокс” багийн лидер Пол Миллсап бэртлийн улмаас оролцоогүй учир ийнхүү олон онооны зөрүүтэй хожигдоход нөлөөлсөн юм. NBA-гийн дараалсан гурван онооны дээд амжилтын эзэн Кайл Корвер өнөөдрийн тоглолтод таван оноо авсан байна.