2014 оны газар зохион байгуулалтын төлөвлөгөөнд тусгагдсан давхар гараж барих асуудлаар Баянгол дүүргийн Засаг дарга Д.Оросоо болон Өмч, газрын харилцааны албаныхан өнөөдөр уулзалт хийлээ. Тэд гараж эзэмшигч, ашиглагч иргэдийг хүлээн авч уулзан, санал солилцжээ. Энэ үеэр нийт 11 байршилд дээрээ хүүхдийн тоглоомын талбайтай, газар доороо авто зогсоолтой гараж, мөн олон давхар гараж барихаар төлөвлөгдсөн талаар иргэдэд танилцуулсан юм.

Уулзалтанд ирсэн иргэд олон давхар гаражийг бүгд дэмжиж байгаагаа илэрхийлээд, гараж барих зураг төсөл, эдийн засгийн тооцоог хийхээр болж, саналаараа зургаан иргэн энэ ажил дээр хамтарч ажиллахаар болов.

Төвлөрсөн гаражтай болсноор ойр орчмын хог хаягдал багасч, эрүүл аюулгүй орчин, амьдрах таатай нөхцөл бүрдэхээс гадна автомашины хулгай зэрэг элдэв сөрөг үр дагавараас сэргийлж, хотын өнгө үзэмжинд сайнаар нөлөөлнө гэдгийг албаны хүмүүс хэлж байлаа.