“Эх, хүүхдийн эрүүл мэндийг дэмжих жил” сэдэвт эрүүл мэндийн салбарын удирдах ажилтнуудын зөвлөгөөн өнөөдөр Эрүүл мэндийн яаманд эхэллээ. Эрүүл мэндийн салбар өнгөрөгч 2013 оныг эрүүл мэндийн салбарын хариуцлага, хяналтыг сайжруулах жил болгон зарласан бол энэ жилийг эх хүүхдийн эрүүл мэндийг дэмжих жил болгон зарласан юм. Тиймээс энэ удаагийн удирдах ажилтны зөвлөгөөн эх хүүхдийн эрүүл мэндийн тусламж, үйлчилгээний хүртээмж, чанар, аюулгүй байдалд чиглэгдэж, аймаг, нийслэлийн эрүүл мэндийн байгууллагуудын удирдлага, эрдэмтэн, судлаачид, түншлэгч олон улсын болон төрийн бус байгууллагууд, салбарын үйлдвэрчний эвлэлийн байгууллагын 200 гаруй төлөөлөл оролцож, санал бодлоо солилцож байна.

Эрүүл мэндийн сайд Н. Удвал эрүүл мэндийн салбарын зөв бодлого, эмч эмнэлэгийн мэргэжилтнүүдийн нөр их хөдөлмөр, зүтгэлийн үр дүнд өнгөрсөн онд хүн амын нийт баралт 5,9 хувиар, эхийн нас баралт 5,9 промиль, нялхсын болон 5 хүртэлх насны хүүхдийн эндэгдэл 0,9 промиллээр тус тус бууруулж, Монгол Улс Мянганы хөгжлийн 4,5 дахь зорилтын 2015 онд хүрэх түвшинд хүрсэн нь том амжилт болсон хэмээн хэллээ.  Мөн салбарын сайдын тодотгосноор эрүүл мэндийн ажилтны мэргэжлийн алдаа, доголдол, ёс зүй, хариуцлагын алдааг зохицуулах хууль эрх зүйн орчин дутагдалтай байсанд дүгнэлт хийж хуулийн төслийг боловсруулж эхэлжээ. Энэ нь эмнэлгийн мэргэжилтний мэргэжлийн үйл ажиллагаанаас үүдэж болзошгүй эрсдлийг бууруулах, эрсдэл учирсан тохиолдолд хохирлыг даатгалын байгууллагаар нөхөн төлүүлэх, хохирогчийн эрхийг хамгаалах харилцааг зохицуулах, эрүүл мэндийн ажилтны хариуцлагын даатгалын хуулийн төсөлж аж.

Зөвлөгөөн маргааш хоёр дахь өдрөө үргэлжилнэ.