“Баптист” христийн чуулганы илтгэгч нэрийн дор тагнуул хийж байсан Өмнөд Солонгосын иргэн Ким Юнг Ук өнгөрсөн аравдугаар сард Хойдод баривчлагдан хоригджээ. Ким Юнг Ук БНАСАУ-д хоригдсоноосоо хойш өчигдөр /II.26/ анх удаа хэвлэлийн бага хурлаар олны өмнө гарч, эрүүл саруул буйгаа гэр бүлийнхэндээ мэдэгдсэн байна. Тэрээр  Өмнөд Солонгосын тагнуулын албатай хамтран ажиллаж, БНАСАУ-ын эсрэг гэмт хэрэг өдүүлснээ хүлээн зөвшөөрч, эрх баригчдаас өршөөл хүсчээ. Ким Юнг Ук нь Хойд Солонгосын албаныхан түүнд ямар ял, шийтгэл оногдуулахыг мэдэхгүй байгаа ч өршөөл үзүүлэхийг гуйсан байна.

“AP” агентлагт мэдээлснээр Ким Юнг Ук нь өнгөрсөн аравдугаар сард Хятадын Даньдун хотоор дамжин Хойд Солонгосын хилийг нэвтэрсэн аж. Үүний дараа тэрээр Өмнөд Солонгосын тагнуулын албаныхантай холбогдож, тэдэнд мэдээлэл дамжуулж, шашнаар дамжуулан БНАСАУ-ын улстөрийн дэглэмийг түлхэн унагаах бодлогыг гүйцэлдүүлж байсан гэнэ. Үүний хариуд тэрээр Өмнөд Солонгосын тагнуулын газраас их хэмжээний мөнгөн тэтгэмж авдаг байснаа хүлээжээ. Үүгээр ч зогсохгүй Ким Юнг Ук Хятадын Даньдун хотод байрлах сүмийн гишүүдэд Хойд Солонгост байдал яг ямар байгааг мэдэгддэг байсан аж.

Үүнээс өмнө өнгөрсөн арваннэгдүгээр сард Хойд Солонгосын талаас Өмнөдийн тагнуулчийг баривчилсан талаар мэдэгдсэн боловч үүнийг БНСУ-ын Үндэсний тагнуулын албанаас эрс үгүйсгэж байсан юм.