УИХ-ын гишүүн Л.Энх-Амгалан, Хөвсгөл аймгийн Засаг даргын тамгын газартай хамтран 2 дахь жилдээ Хөвсгөл аймгийн Удирдах ажилтны Зөвлөгөөнийг зохион байгууллаа. Энэхүү зөвөлгөөнийг жил бүрийн эхний улиралд зохион байгуулдаг уламжлал тогтоосон нь хийх ажлаа төлөвлөж хийснээ дүгнэхэд дөхөмтөй байдаг хэмээн тус аймгийн Засаг дарга А.Эрдэнэбаатар хэлж байв. Тус аймгийн 24 сумын Засаг дарга, ИТХ-ын дарга, ЗДТГ-ын дарга, ИТХТ-ийн нарийн бичгийн дарга, 125 багийн Засаг дарга нар болон Засаг даргын эрхлэх хүрээний хэлтэс, агентлагын, ОНӨҮГ-ын дарга нийт 300 гаруй хүн уг зөвөлгөөнд оролцлоо.

Иргэндээ хүрч үйлчлэх, шуурхай, чанартай үйлчилгээг үзүүлэхэд ёс зүйтэй удирдлагын манлайлал чухал байгааг онцлов. Аймгийн Засаг дарга А.Эрдэнэбаатар хэлсэн үгэндээ "Авилга, ашиг сонирхолоос ангид байх, "том" дарга биш "ухаалаг" дарга байх, мэдээллийн ил тод байдлыг хангасан, иргэндээ ээлтэй үйлчилгээ үзүүлж ажиллах талаар онцгой анхаарч ажиллахыг хүслээ. Мөн зөвлөгөөнтэй холбогдуулан уриалга, албан даалгавар гаргаж, хэрэгжилтийг хангуулах ажлыг зохион байгуулахаар болов.

Зөвлөгөөний өмнө УИХ-ын гишүүн Л.Энх-Амгалан 22 суманд, Хөвсгөл аймгийн Засаг дарга А.Эрдэнэбаатар 18 суманд ажилласан нь тухай сум багт төрийн үйлчилгээ иргэддээ хэрхэн чанартай хүрч байгаа талаар дэлгэрэнгүй мэдээлэлтэй болсон байсан юм.