Улаанбаатар хотод унадаг дугуйн зам барихад боломжтой, аюулгүй орчинг тодорхойлох, цаашид баригдахаар төлөвлөсөн зам, уулзварын зураг төсөлд дугуйн замыг тусгуулах зорилгоор “Унадаг дугуйтай Улаабаатар” нээлттэй хэлэлцүүлгийг зарлаж байгаа ажээ.  Өнгөрсөн оноос эхлэн залуусын чөлөөт цагийг зөв боловсон өнгөрүүлэх зорилгоор “Спирт үү, спорт уу” аяныг МЗХ-оос өрнүүлсэн бөгөөд энэ хүрээнд Улаанбаатар хотыг унадаг дугуйн замтай болгох чиглэлээр олон ажлыг эхлүүлжээ. Өнгөрсөн онд нэг сарын турш  цаасан болон цахим хэлбэрээр иргэдийн дунд санал асуулга явуулж,  нийт 25,521 санал авчээ.

“Унадаг дугуйтай Улаанбаатар” төслийг хэрэгжүүлэхэд зориулж нэг тэрбум төгрөгийн санхүүжилтийг 2014 оны ерөнхий төлөвлөлтөнд суулгаад байгаа юм.  Тиймээс Улаанбаатар хотод хаана унадаг дугуйн зам баривал зохистой талаарх нээлттэй хэлэлцүүлгийг зохион байгуулахаар болжээ.  Хэлэлцүүлэг энэ  сарын 28-ны өдөр МЗХ-ны байранд олох ажээ. Хэлэлцүүлэгт тус холбооноос гадна  Эдийн засгийн хөгжлийн яам, Гудамж төсөл, Нийслэлийн Засаг даргын тамгын газар, Нийслэлийн ерөнхий төлөвлөлтийн газар, Замын цагдаагийн газар, Нийслэлийн авто замын газар, Нийслэлийн хөрөнгө оруулалтын газар, Замын хөдөлгөөний удирдлагын төв, ШУТИС-ийн төлөөлөл, Монголын дугуйн холбоо, Монголын триатлоны холбоо, Монголын авто замчин залуучуудын холбоо, Залуу дугуйчин клуб зэрэг байгууллагууд оролцох юм байна.