Европийн хөлбөмбөгийн холбооны “Аваргуудын лиг”-ийн хасагдах шатны эхний тоглолтод Английн “Манчестер Юнайтед” Грекийн “Олимпиакос” багийн талбайд зочлон 2:0-ийн харьцаатай хожигдлоо. “Олимпиакос” багаас тоглолтын 38 дахь минутад А.Домингес, 55 дахь минутад Ж.Кэмпбэлл гоол оруулж, Европи тивийн хамгийн хүчирхэг өрсөлдөгч “Манчестер Юнайтед”-ыг буулган авлаа.

Ингэснээр “Манчестер Юнайтед” багийн дасгалжуулагч Дэвид Мойес үнэнч хөгжөөн дэмжигчдийнхээ шүүмжлэлийн “бай” болж байна. Энэ тоглолтод “Манчестер Юнайтед” 54 хувьтай бөмбөг эзэмшиж, бага зэрэг илүү тоглосон ч эсрэг багийн хаалганд 89 дэх минутад ганцхан удаа оновчтой цохисон нь хөгжөөн дэмжигчдийг бухимдуулахад хүргэжээ.

Тоглолтын дараа “Манчестер Юнайтед” багийн дасгалжуулагч Дэвид Мойес

-Энэ хожигдолд би буруутай. Бидний Европийн хэмжээнд үзүүлсэн хамгийн муу тоглолт байлаа. Тоглолтын өмнө бид маш сайн формтой, сайхан сэтгэлзүйтэй байсан. Гэсэн ч тоглолт дээр үүнийг гаргаж чадсангүй. Тоглолтод хожигдсон бүх бурууг би хүлээх болно гэж хэвлэлийн хурлын үеэр сэтгүүлчдэд хэлсэн байна.
 
Харин “Олимпиакос” багийн дасгалжуулагч Микел

-“Манчестер Юнайтед” хэмээх гайхамшигтай багийг хожсон нь бидний хувьд онцгой юм. Гэхдээ хариу тоглолт гэж бий. Дараагийн шатад шалгарахын тулд хоёр гоол гэдэг хангалтгүй. Тиймээс “Манчестер Юнайтед” багийн талбайд маш сайн тоглох хэрэгтэй гэдгийг онцолсон байна.

2013-2014 оны “Аваргуудын лиг”-ийн хасагдах шатны эхний тоглолтуудад зочин багаар тоглосон буюу хэсгийн шатнаас нэгдүгээр байраар шалгарсан бүх багууд хожсон. Харин Английн “Манчестер Юнайтед” ганцаараа зочлон тоглолтдоо хожигдсон баг боллоо.

Мөн өнгөрсөн шөнө ОХУ-ын “Зенит” талбайдаа Германы “Боруссия Дортмунд” багийг хүлээн авсан ч барсангүй 4:2-ын харьцаатай хожигдлоо. “Боруссия Дортмунд” дараагийн шатад шалгарах болзлоо хангасан.

Тоглолтын дөрөв дэх минутад “Боруссия Дортмунд” багийн Хенрик Мхитарьян, тав дахь минутад Марко Ройс гоол оруулснаар “Зенит” хожигдох нь тодорхой болсон. Хоёрдугаар үеийн 57 дахь минутад “Зенит” багийн Олег Шатов гоол оруулж, тооны харьцааг 2:1-ийн харьцаатай болгож ойртуулсан ч “Боруссия Дортмунд” багийн Роберт Левандовски 61 дэх минутад гоол оруулсан. 69 дэх минутад “Зенит” багаас ганц сайн тоглож байсан торгуулийн 11 метрийн цохилтоос Халк гоол оруулсан ч 71 дэх минутад дахин Роберт Левандовски гоол оруулсан юм. Дараагийн тоглолтод “Зенит” “Боруссия Дортмунд” багийг талбайд нь гурван гоолын зөрүүтэй хожсон тохиолдолд цааш шалгарна. Гэвч “Боруссия Дортмунд” багийг “Сигнал Идуна” цэнгэлдэхэд нь хожно гэдэг тун хэцүү. 

“Аваргуудын лиг”-ийн хасагдах шатны эхний тоглолтууд өнөө шөнө үргэлжилнэ.

Өнөө шөнө 03:45 цагаас болох тоглолтууд /Улаанбаатарын цагаар/:

• Галатасарай /Турк/ – Челси /Англи/
• Шальке 04 /Герман/ – Реал Мадрид /Испани/