Испанийн хөлбөмбөгийн дээд лиг “Примера Дивисион”-ы 25 дугаар тойргийн тоглолтод Каталон үндэстний бахархал “Барселона” “Реал Сосейдад” багийн талбайд зочлон, 3:1-ийн харьцаатай хожигдлоо. Ингэснээр лигийг тэргүүлж байсан “Барселона” хоёрдугаар байр руу уналаа.25 дугаар тойргийн тоглолтод “Барселона” багийн мөнхийн өрсөлдөгч “Реал Мадрид” өрсөлдөгчөө хожиж, лигийг тэргүүлж эхэллээ. Криштиан Роналду торгуулийн улмаас өнжсөн ч “Реал Мадрид” багийн залуу тоглогчид болох Гарет Бэйл, Иско, Ильярраменди, Хесе Родрегис нар сайн тоглож, “Элче” багийг 3:0-ийн харьцаатай хожсон юм. Испанийн “Примера Дивисион” лигийг 63 оноотой “Реал Мадрид” тэргүүлж эхэлсэн. Харин 25 тоглолтод хийсэн “Барселона”, 24 тоглолт хийсэн “Атлетико Мадрид” багууд 60 оноотой удаах байруудад бичигдэж байна.