2010 оны драфтын шилдэг тавд нэрлэгдэж байгаа сүүлчийн тоглогч бол Уэсли Жонсон юм. Тэрбээр 1987 оны долдугаар сарын 11-нд  Техас мужийн Корсикана хэмээх жижиг хотод мэндэлжээ. Хүчний довтлогчийн байрлалд тоглодог энэ залуугийн биеийн өндөр нь 201 см, биеийн жин нь 93 кг юм байна. Бага байхдаа л маш биерхүү байсан тэрбээр Корсиканагийн ахлах сургуулийнхаа багт тоглохын зэрэгцээ дүүргийнхээ шигшээ багт тоглож нэг тоглолтод 15.2 оноо, 9.7 самбараас бөмбөг авалт, 4.3 блок шотыг дунджилж байв. 2006 онд ахлах сургуулиа төгссөн Жонсон тэр жилдээ Айовагийн их сургуульд элсэн орж шигшээ багт нь тоглож эхэлсэн байна. Сагсан бөмбөг тоглохоос гадна хичээл номондоо тун сайн энэ залуу элсэлтийн шалгалт өгч,өөрийн хүчээр сургуульдаа тэнцжээ.

Уэсли Жонсонгийн хувьд фрэшмэн буюу NCAA-д орсон эхний жилдээ 31 тоглолтод оролцож 12.3 оноо, 9.7 самбараас бөмбөг авалтыг дунджилж байлаа. Жилээс жилд үзүүлэлт нь сайжирсаар байсан энэ залууг маш нэр хүндтэй их сургууль болох “Сиракауз”-ын их сургууль өөрийн болгож чадсанаар “Сиракауз Оранж” багт тоглох болсон юм. NBA-ын драфтад ороход нөхцөл бололцоогоор дүүрэн байсан ч өөрийн боловсролд анхаарч их сургуулиа төгсөөд  NBA-ын драфтад нэрээ өгөх шийдвэр гаргасан байна. NCAA-д тоглосон хамгийн сүүлин жилдээ Жонсон 16.0 оноо, 8.4 самбараас бөмбөг авалтыг дунджилж байсан бөгөөд NCAA-ын нэгдүгээр багт багтаж, сарын шилдэг тоглогчийн шагналыг хэд хэдэн удаа хүртсэн байна. Энэ залуу хэрвээ судлаачдын үзэж байгаагаар драфтын таваар гарвал “Сакраменто Кингс” багт очих бололцоотой байгаа юм.         
Г.Баярмөнх
Score Studio