Сочийн олимпийн хоккейн аваргын төлөө Канад болон Шведийн багууд өрсөлдөхөөр боллоо. Өчигдөр болсон хагас шигшээ тоглолтод олимпийн аварга канадууд 1:0 харьцаатай АНУ-ын шигшээг буулган авч, аваргын төлөө өрсөлдөх эрхээ авсан юм. Хагас шигшээ шатны нөгөө тоглолт Швед болон Финляндын багийн хооронд болж, шведүүд 2:1-ээр ялалт байгуулсан байгаа. Ийнхүү олимпийн хүрэл медалийн төлөө Финлянд болон АНУ өнөөдөр Улаанбаатарын цагаар 23:00 цагт тоглох бол аваргын төлөөх тулаан олимпийн хаалтын өдөр буюу маргааш Улаанбаатарын цагаар 20:00 цагт эхэлнэ.

Сочийн олимпийн 15 дахь өдөр буюу өчигдөр Украины тамирчид анхны алтан медалиа гардлаа. Төрөлх нутагт нь бослого тэмцэл үргэлжилж, дэлхийн халуун цэг болоод буй энэ үед Украины тамирчдын энгэрт гялалзсан тэр алтан медаль юу юунаас илүү үнэ цэнэтэй. Украины эмэгтэй биатлончид өчигдөр болсон багийн буухиа төрөлд 1:10:02.5 цагийн амжилт үзүүлснээр олимпийн аваргаар тодорчээ.
Цагаан олимпийн өчигдөр болсон тэмцээн, уралдаанаас бас нэгэн онцлох үйл явдал нь ОХУ-ын шорт-трекчид хос алтан медаль хүртсэн явдал байлаа. Солонгос гаралтай тамирчин Виктор Ан шорт-трекийн эрэгтэйчүүдийн 500 метрт 41.312 секундын амжилтаар түрүүлж, дараа нь багийнхаа нөхдийн хамт эрэгтэй 5000 метрийн багийн буухиа төрөлд 6:42.100 минутад олимпийн рекорд эвдэн түрүүлж, нэг өдөр хос алтан медаль гардсан юм. Ийнхүү ОХУ-ын баг тамирчид есөн алтан медальтай медалийн хүснэгтийн хоёрдугаар байр руу давшин орж ирлээ.

Уулын цана /эмэгтэй, слалом/:

Алт: Микеала Шиффрин /АНУ/ 1:44.54
Мөнгө: Марлис Шилд /Австри/ 1:45.07
Хүрэл: Катрин Зеттел /Австри/ 1:45.35

Биатлон /эмэгтэй, 4х6 км буухиа/:

Алт: Украин 1:10:02.5
Мөнгө: ОХУ 1:10:28.9
Хүрэл: Норвеги 1:10:40.1

Кёрлинг /эрэгтэй/:

Алт: Канад
Мөнгө: Их Британи
Хүрэл: Швед

Цанын чөлөөт үсрэлт /эмэгтэй, кросс/:

Алт: Мариель Томпсон /Канад/
Мөнгө: Келси Серва /Канад/
Хүрэл: Анна Холмлунд /Швед/

Шорт-трек /эрэгтэй, 500 метр/:

Алт: Виктор Ан /ОХУ/ 41.312
Мөнгө: Ву Дажин /БНХАУ/ 41.516
Хүрэл: Чарль Коурноейр /Канад/ 41.617

Шорт-трек /эмэгтэй, 1000 метр/:

Алт: Пак Сюн-Хи /БНСУ/ 1:30.761
Мөнгө:  Фан Кесин /БНХАУ/ 1:30.811
Хүрэл: Шим Сук-И /БНСУ/ 1:31.027

Шорт-трек /эрэгтэй, 5000 метр, багийн буухиа/:

Алт: ОХУ 6:42.100
Мөнгө: АНУ 6:42.371
Хүрэл:  БНХАУ 6:48.341