УИХ-ын гишүүн, УИХ дахь МАН-ын бүлгийн дарга С.Бямбацогт энэ сарын 18-24-ний өдрүүдэд баруун бүсийн тулгуур төв, өөрийн сонгогдсон тойрог Ховд аймагт ажиллаж байна. Мөн энэ үеэр УИХ дахь АН-ын бүлгийн дарга Б.Эрдэнэбат, ССАЖ-ын сайд Ц.Оюунгэрэл, ХАХНХ-ийн дэд сайд Э.Тамир нар мөн Ховд аймаг ажиллаж, Ховд аймгийн төвд баригдаж байгаа битүү захын нээлтэд оролцлоо. 

Аймаг орон нутгийн хувьд УИХ дахь хоёр бүлгийн дарга нар, тойргоос сонгогдсон УИХ-ын гишүүдийн айлчлал давхцаж байгаа нь орон нутгийн хөгжилд тулгамдаж буй олон асуудлыг газар дээр нь хамтаар үзэж харж, цаашид шийдвэрлэхэд илүү дөхөмтэй, давуу талтай гэж онцлохоор байна. Энэ сарын 21-ны өдөр аймгийн ЗДТГ-ын хурлын танхимд Ховд хотын ерөнхий төлөвлөгөөг УИХ, Засгийн газрын төлөөлөл болон ард иргэдэд танилцуулах тайлан хуралд оролцож санал бодлоо солилцлоо. Улсын төсвөөс 1,3 тэрбум орчим төгрөг зарцуулан гадны мэргэжлийн байгууллагаар хийлгэж буй уг төлөвлөгөөг эрх ашиг нь хөндөгдөх нийгмийн сегмент, ард иргэдээр сайтар хэлэлцүүлж, саналыг тусгах, цаасан дээрээс ажил болгоход онцгойлон анхаарахыг С.Бямбацогт дарга санууллаа.

Мөн энэ сарын 21-ны өдөр бусад албаны хүмүүсийн хамтаар аймгийн төв дэх Битүү худалдааны төвийн нээлтэнд оролцож жижиг дунд бизнес эрхлэгчидтэй уулзлаа. Үүний дараа 2014 оны төсөвт тэг дүнтэй тусгагдсан буюу царцсан барилга объектуудаар орж, удааширсан, зогсонги байдалд орсон шалтгаануудыг тодруулж, цаашид ямар арга хэмжээг авах шаардлагатай байгаа талаар тус аймагт ажиллаж буй Засгийн газрын зарим сайд нар болон УИХ- дахь олонхийн бүлгийн дарга Б.Эрдэнэбат нарт танилцууллаа.

Ховд аймгийн хувьд 2007 оноос хойш төсвийн хөрөнгө оруулалт эрчимтэй нэмэгдэж, маш олон барилга байгууламж, дэд бүтцийн байгууламж хийгдсэн нь аймгийн хөгжлийг олон алхам урагшуулсан юм. Олон ястны өлгий нутаг, хөдөлмөрч тэмцэгч чанар шингэсэн уг аймгийн хувьд төвөөс алслагдмал байдал нь амьжиргааны өртөг зардалд шууд нөлөөлж байдаг ч бүх сум нь эрчим хүчинд холбогдож, 200 гаруй км авто зам тавигдаж, эрүүл мэнд, боловсролын салбар, нутгийн удирдлагын барилга байгууламж олноороо шинэчлэгд бий болсон аймаг юм. Шинэ дулааны станц, гэр хорооллын цэвэр бохир усны шугам сүлжээний ажил, баруун бүсийн хүүхдийн парк зэрэг томоохон бүтээн байгуулалтууд өрнөж байна.  Бусад аймгуудад байхгүй том паркыг Ховдчууд бүтээж чаджээ. Хаана ч байхгүй хямд үнэ буюу нэг тоглоом нь 1000 төгрөгийн тарифтай тус паркаар зөвхөн өнгөрөгч онд гэхэд 140 мянган хүүхэд, залуус үйлчлүүлжээ. Мөн зуны цагт найман настай балчираас 80 настай ахмадууд, залуу үр хүүхэд, ач гуч, найз нөхдөө дагуулан очиж амарч зугаалдаг гол газар нь болсныг нутгийн удирдлагууд онцолж байлаа. Энэ мэтчилэн олон давуу тал, хийж бүтээгдсэн зүйл Ховд аймгийн өнгө төрх, өөдрөг жавхааг нэмж байв.

Өмнөх парламентын үеэс бодлого болгон дэвшүүлсэн төсвийн хуулийн үр дүнд орон нутаг бие даан зарцуулах төсвийн хэмжээ эрс нэмэгдэж 2013, 2014 онуудад тус бүр 11 тэрбум төгрөг хуваарилагдсан билээ. Уг төсвийг оновчтой, хүртээмжтэй, үлдэцтэй зүйлд зарцуулах, иргэдэдээ нээлттэй ил тод байлгах, ингэхдээ ор нэрийн төдий саналыг авсан байдлаар ач холбогдол багатай зүйлд зарцуулахгүй байхад анхаарах нь чухал юм гэдгийг гишүүд онцолж байлаа.