Нүүрсийг угааж гэмээнэ үнэд ордгийг монголчууд хэдийнэ баталчихсан. Гэвч говь нутагт ус гэдэг алтнаас үнэтэй. Тиймээс Энержи ресурсийнхэн ашигласан усаа дахин боловсруулаад дахин ашиглаж байгаа тухай “Coal Mongolia”-д оролцогчид өгүүлж байлаа. Тэгвэл Эрдэнэс Тавантолгойнхон нүүрсийг элсээр угаах бас нэгэн арга олжээ. Говьд хамгийн элбэг элсийг нүүрс цэвэршүүлэхэд ашиглах боломжийн талаар Эрдэнэс Тавантолгой ХК-ийн гүйцэтгэх захирал Я.Батсууриас тодрууллаа.

-Энэ бол тун боломжит хувилбар гэж бид харж байна. Японы JCOAL болон Nagata EngineeringLLC-тай  хамтран элс ашиглан хуурай аргаар нүүрс баяжуулах технологийг туршиж үзлээ. Онгоцоор 2 тонн нүүрс зөөвөрлөн Японд хүргэж туршилт хийсэн.Туршилт амжилттай болсон. Экологид ээлтэй энэ технологийг бид нэвтрүүлнэ.Ус бол говьд ховор.Гүний усаар нүүрс угаана гэдэг экологид харшийн дээр нүүрсийг элсээр угаах нь усаар угааснаас хамаагүй бага өртөгтэй тусч байна. Тиймээс бид ойрын үед нүүрсийг хуурай аргаар угаах туршилтын үйлдвэрийг  уурхай дээрээ байгуулахаар болсон. Одоохондоо хүчин чадал бага байгаа ч алсдаа нэмэгдүүлэх боломж бий. Ингэж гэмээнэ бид нүүрсээ өртөг шингээн гадаадад экспортлох боломж бий. Нүүрсний үнэ  ч өснө гэлээ.