Шивээ-Овоогийн уурхайн захирлын зөвлөлийн хурлаар уг судалгааны тайланг хэлэлцэж, нүүрс, хөрсийг ангилан-олборлох Виртген технологи нь Шивээ-Овоогийн уурхайд нэн тохиромжтой болохыг дүгнэж, уурхайн зүгээс санхүүгийн болон технологийн ямар нэгэн эрсдэлгүй байх нөхцлөөр туршилтын олборлолт хийх гэрээг ийнхүү үзэглэсэн байна.

Туршилт үр дүнтэй болвол уурхайн өрөмдлөг, тэсэлгээний болон бутлуурын цехийн зардал хэмнэгдэж,  нүүрсний чанар илчлэг нь дээшлэх боломжтой аж.  Шивээ-Овоогийн уурхайн нүүрсний үнэ хэт доогуур байдгаас ихээхэн алдагдалтай ажилладаг бөгөөд өнгөрсөн онд гэхэд л 3,2 тэрбум төгрөгийн алдагдал хүлээжээ.  Цаашдаа уурхай гүнзгийрч хөрс хуулалт нь нэмэгдэх тул нүүрс олборлолтын зардал нь улам өсөх юм байна. Уурхайн шинэ удирдлагын баг нүүрсний үнийг нэмэх механик арга хэрэглэхээсээ илүүтэй үйлдвэрлэлийн зардлыг хэмнэх, олборлолтын шинэ дэвшилтэт техник, технологи нэвтрүүлэх, бүтээмжийг нэмэгдүүлэх, менежментийн арга барилаа өөрчилж үр ашигтай ажиллах чиглэлээр ихээхэн анхаарал хандуулж байна. Виртген брэндийн комбайнаар нүүрс ангилан олборлох туршилтын үйлдвэрлэл Шивээ-Овоогийн уурхайд амжилттай хэрэгжвэл уурхайн үр ашигтай олборлох нүүрсний нөөц үлэмж хэмжээгээр нэмэгдэхийн сацуу техник, технологийн дэвшлийг төрийн өмчит уурхайнуудад нэвтрүүлж, зардал хэмнэх жишиг тогтох давуу талтай.

Ингэснээр төвийн эрчим хүчний системийг чанар сайтай нүүрсээр хангаж хэрэглэгчидэд хүрэх дулаан, цахилгааны эрчим хүчний үнийг тогтвортой байлгахад үр өгөөжөө өгөх юм.