Монголын Үндэсний Сагсан Бөмбөгийн Холбооноос зохион байгуулж байгаа Үндэсний Супер Лигийн плэй-оффын эхний шатны цувралын  хоёр дахь тоглолтууд өчигдөр явагдлаа.

Эхний тоглолт “Дорнод Танан Гарьд” болон “УБ Альянс Тех ШУТИС-н Харцага” багуудын хооронд болсон. Эдгээр багуудын цувралын эхний тоглолт сүүлийн мөч хүртлээ сонирхолтой үргэлжилсэний эцэст Харцагууд өрсөлдөгчөө буулган аваад байсан. Өчигдөр болсон тоглолт ч мөн маш тэнцүүхэн эхэлсэн. Мөн эдгээр багуудын тоглолт маш нягт хамгаалалттай өрнөж байгаа. Тиймээс эхний хагас 38-34 харьцаатай өндөрлөсөн.

Мөн шагайндаа мэс засал хийлгэж, бараг гурван сар орчмын хугацаанд талбайд гараагүй байсан  Гарьдуудын гол тоглогчидын нэг О.Ууганбаяр энэ тоглолтонд эргэн ирсэн. Тэрээр цөөхөн минут талбай дээр тоглосон ч, багтаа тун хэрэгтэй байсан довтолгоонуудыг гүйцэтгэж, 10 оноо авсан. Мөн ОУХМ Г.Ихбаяр талбай дээр гарч тоглосон. Ингэснээр Гарьдууд энэ тоглолтонд бүрэн бүрэлдэхүүнээрээ бэлэн байж, тоглолтын эхнээс оноог бага зэрэг тэргүүлж байлаа.

Гэсэн ч Үндэсний Супер лигт тоглолт бүр эцсийн мөчид шийдэгддэг. Энэ удаад ч тоглолтын дөрөвдүгээр үед Харцагуудын тоглолт сэргэж, 15 онооны зөрүүг дөрөв болтол нь ойртуулж ирсэн. Харцагуудаас энэ тоглолтонд багийн ахлагч Б.Одбаяр 22 оноо, 16 самбар, П.Болортулга 17 оноо, 11 самбар, Marcus Hammonds 16 оноо, 8 самбар, Б.Нэмэхбаяр 11 оноо, Г.Баттөр 8 оноо авч, 6 оновчтой дамжуулалт өгчээ.

Гэсэн ч Гарьдууд өрсөлдөгчдөө бүрэн боломж олгосонгүй. Шийдвэрлэх мөчүүдэд Ц.Азбаярын холын зайн шидэлтүүд болон дамжуулалт амжилттай болсоноор оноог холтгож чадсан. Гарьдуудаас энэ өдөр Dane Rawlins 17 оноо, 17 самбар, Joe Davis 16 оноо, 8 оновчтой дамжуулалт, Б.Мөнхболд 15 оноо, 6 самбар, М.Отгонмөнх 11 оноо, 5 самбар, Ц.Азбаяр 10 оноо, О.Ууганбаяр 10 оноо, Freddie Woods 6 оноо, 8 самбар авчээ. Улмаар энэ тоглолтонд “Дорнод Танан Гарьд” баг 93:84 харьцаатай өрсөлдөгчөө буулган авч, цувралын харьцааг 1-1 болгон тэнцүүллээ. Цувралын 3 дахь тоглолт маргааш буюу баасан гарагт 18 цагаас СТО-нд болно.

Холын зайн 35 шидэлт амжилттай болж, Супер лигийн рекорд тогтоогдлоо

Сэтгэл сэргээм Үндэсний Супер Лигийн энэ улирлалыг О.Баярцогт дасгалжуулагчтай “Сүхбаатар SBL Хасын Хүлэгүүд” баг 12 хожилтойгоор тэргүүлсэн. Тиймээс дасгалжуулагч О.Баярцогт энэ улирлын шилдэг дасгалжуулагчын шагналаа, “Баянгол Гурван Тамир” багтай хийсэн цувралын хоёр дахь тоглолтын өмнө гардан авлаа.

Энэ хоёр багийн цувралын эхний тоглолтонд Хүлэгүүд эхнээсээ давамгайлсаар хожиж байсан. Харин өчигдөр болсон тоглолтонд Гурван Тамир багийнхан тактикаа өөрчилж, төвийн тоглогчгүйгээр гарааны бүрэлдэхүүнээ гаргасан байлаа. Энэ нь ч үр дүнтэй болж, Гурван Тамир багийн хурдан довтолгоо, холын зайн шидэлтүүд гайхалтай болж байлаа. Ингэснээр эхний үе үнэхээр сонирхолтой болж, маш хурдтай довтолгоонууд өрнөснөөр, маш олон оноо авалцсан үе болж, улмаар Гурван Тамир баг 36-24 харьцаатай илүүрхсэн.

Гэсэн ч тоглолтын хоёрдугаар үед Гурван Тамир багийн хамгаалалт тааруу байснаар, Хүлэгүүдийн холын зайн шидэлтүүд амжилттай болж, онооны зөрүүг нөхөж чадсан. Хүлэгүүд эхний хагаст багаараа холын зайн 11 шидэлтээ амжилттай болгосноор, эхний хагас 63-62 харьцаатай өндөрлөсөн.

Мөн энэ тоглолтонд Супер Лигийн нэгэн рекорд амжилт тогтоогдож, 2 багууд нийлээд холын зайн 35 шидэлтээ амжилттай болголоо. Үүнээс 17-г нь Гурван Тамир баг хийсэн бол, 18-г нь Хүлэгүүд хийж, рекорд амжилт тогтоолоо. Тэр дундаа довтлогч Б.Билгүүн холын зайнаас 8 шидэж, бүгдийг нь цагариганд хийсэн. Тэрээр энэ өдөр довтолгоонд тун гайхалтай байж, 80 хувьтай довтолсоноор, 34 оноо, 6 самбар авч багаа тэргүүлсэн. Мөн Т.Санчир 21 оноо, 5 оновчтой дамжуулалт, Чу Мадуабум 13 оноо, 11 самбар, Horace Bond 11 оноо, 17 самбар, О.Сэргэлэн 7 оноо, 9 самбар, 11 оновчтой дамжуулалт, З.Доржсүрэн 9 оноо, А.Бямбадорж 7 оноо авчээ. Ингэснээр нийт онооныхоо талыг нь холын зайнаас авсан Хүлэгүүд энэ тоглолтонд 106:102 харьцаатайгаар, 2 дахь хожлоо авлаа.

Харин Гурван Тамир багаас А.Гансүх 20 оноо, Chris Lawson 19 оноо, 6 самбар, 10 оновчтой дамжуулалт, Austin Witter 17 оноо, 11 самбар, Б.Дархантөгс 15 оноо, 7 самбар, Г.Цэнгүүнбаяр 11 оноо, Г.Чинбат 7 оноо, P.J.Gaynor 5 оноо, 7 самбар авчээ.

Цувралын гурав дахь тоглолт маргааш буюу баасан гарагт Спортын төв ордонд болно.