Монголын Үндэсний Сагсан Бөмбөгийн Холбоо, Сэтгэл Сэргээм брэнд болон Эрч Хүчний Тэсрэлт Sprite брэндүүдтэй хамтран зохион байгуулж байгаа Үндэсний Супер Лигийн плей-оффын тоглолтууд өчигдөр эхэллээ. Энэ улирлын хувьд өмнөх жилээс ч илүү маш их өрсөлдөөнтэй болж, улирлын сүүлийн тоглолтод плей-оффт тоглох багууд тодорсон.

Плей-оффын нээлтийн тоглолт, улиралд 12 хожил байгуулж, улирлыг тэргүүлсэн “Сүхбаатар SBL Хасын Хүлэгүүд” болон 11 хожилтой 4-р байраар шалгарсан “Баянгол Гурван Тамир” багуудын хооронд болсон. Энэ тоглолтыг Монголд анх удаагаа Олон Улсын Сагсан Бөмбөгийн Холбооны албан ёсны шүүх эрхтэй, 3 шүүгч зэрэг талбай дээр гарч шүүсэн. FIBA-н шүүгчид болох Gabriel Ramirez, Krishna Dominguez болон Б.Ганзориг нар энэ тоглолтыг шүүн явуулсан юм.

Энэ 2 багийн улиралд хоорондоо таарсан тоглолтууд, хамгийн сонирхолтой, сэтгэл сэргээсэн тоглолтууд гарч байсан. Харин плэй-оффын цувралын эхний тоглолтыг “SBL Хасын Хүлэгүүд” баг тун гайхалтай эхлүүллээ. Тэд плэй-оффын туршлагаар, өрсөлдөгчөөсөө илүү баг гэдгээ харуулж, эхний үед 33-13-н харьцаатай илүүрхсэн. Харин “Баянгол Гурван Тамир” багийн хувьд сагсан бөмбөгийн дээд лигт 5 дахь улиралдаа тоглож, ийнхүү плэй-оффын ширүүн өрсөлдөөнийг  энэ өдөр анх удаагаа мэдэрсэн. Улмаар плэй-оффын туршлага нимгэн баг гэдэг нь, торгуулийн шидэлт болон оновчтой дамжуулалтын статистик үзүүлэлтээс нь харагдсан. Гурван Тамир багаараа торгуулийн 18 шидэлтээ алдаж, нийт 13 оновчтой дамжуулалт өгсөн байна. Тэднээс Э.Цэрэнбаатар 17 оноо, 9 самбар, А.Гансүх 11 оноо, 6 самбар, Austin Witter 9 оноо, Chris Lawson 8 оноо, 5 самбар, Э.Дөлгөөн 8 оноо, Г.Цэнгүүнбаяр 7 оноо авч, 4 блок, P.J.Gaynor 7 оноо, 5 самбар авчээ.

Харин Хүлэгүүдээс Б.Билгүүн 24 оноо, 3 бөмбөг таслалт, Т.Санчир 18 оноо, 14 самбар, 5 оновчтой дамжуулалт, Чу Мадуабум 16 оноо, 5 блок, О.Сэргэлэн 10 оноо, 4 оновчтой дамжуулалт, З.Дэлгэрням 10 оноо, 10 самбар, А.Бямбадорж 8 оноо, З.Доржсүрэн 7 оноо авчээ. Ингэснээр цувралын эхний тоглолтонд “Сүхбаатар SBL Хасын Хүлэгүүд” баг 103:84 харьцаатай хожил авлаа. Цувралын 2 дахь тоглолт ирэх лхагва гарагт явагдана.

Плэй-оффын 2 дахь учраа, плэй-оффт 2-р байраар шалгарсан “Дорнод Танан Гарьд” болон 3-р байраар шалгарсан “УБ Альянс Тех ШУТИС-н Харцага” багууд учраа таараад байгаа. Эдгээр багууд өнгөрсөн улиралд мөн л плэй-оффын эхний шатанд таарч байсан. Мөн энэ улиралыг ижилхэн 11 хожилтойгоор дуусгасан ч, хоорондын тоглолтонд Гарьдууд 3 удаа хожоод байсан юм.

Гэхдээ эдгээр хүчирхэг багуудын тоглолтууд төдийлөн олон онооны зөрүүтэй болдоггүй, бүх тоглолтууд нь сүүлийн мөчүүдэд шийдэгддэг уламжлалтай. Энэ удаад ч тоглолт маш сонирхолтой болж, онооны зөрүү тун ойрхон явагдаж байлаа. Мөн 2 багийн хөгжөөн дэмжигчид, СТО-нд цуглаж, багаа тун идэвхитэй дэмжиж, уур амьсгал гайхалтай байсан юм. Энэ тоглолтонд Гарьдуудын бэртэлтэй байсан тоглогчид эргэн ирж, Joe Davis талбай дээр гарч тоглосон бол, ОУХМ Г.Ихбаяр болон О.Ууганбаяр нар тоглоогүй.

Тоглолт эхнээсээ маш нягт хамгаалалттай өрнөж, багууд тун цөөхөн оноог авсан. Танан Гарьд багаас энэ тоглолтонд М.Отгонмөнх 14 оноо, 8 самбар, Б.Мөнхболд 13 оноо, Б.Түмэнжаргал 12 оноо, 6 самбар, Joe Davis 11 оноо, 7 оновчтой дамжуулалт, Ц.Азбаяр 10 оноо, Freddie Woods 7 оноо, 17 самбар авчээ.

Тоглолтын онооны давамгайлал эхнээсээ л бага зэрэг Харцагуудын талд өрнөж байсан юм.Гэсэн ч тоглолтын оргил хэсэг сүүлийн 2 минутанд өрнөсөн. Ц.Азбаяр болон Freddie Woods нарын довтолгоо амжилттай болж, онооны зөрүүг ердөө ганцхан оноо болгож чадсан.

Гэсэн ч Харцагууд энэ үед хамгийн чухал хариу довтолгоогоо амжилттай болгож, Marcus Hammonds үзэгчдийг суудлаас нь босгосон. Ингэснээр энэ тоглолтонд 82:77 харьцаатай “УБ Альянс Тех ШУТИС-н Харцага” баг хожиж, цувралын эхний хожлыг авлаа.

Харцагуудаас 4 тоглогч дабль дабль хийсэн. П.Болортулга 22 оноо, 16 самбар, 4 блок, Б.Одбаяр 22 оноо, 16 самбар, Marcus Hammonds 14 оноо, 10 самбар, Б.Дорждамба 10 оноо, 10 самбар авч, мөн Г.Баттөр 8 оноо авчээ. Цувралын 2 дахь тоглолт маргааш буюу лхагва гарагт 18 цагаас болно.