Сагсан бөмбөг сонирхогчдын 63 дахь удаагийн тоглолт буюу 2014 оны бүх оддын тоглолт Нью-Орлэнс хотын Smoothie King цэнгэлдэх хүрээлэнд хоёрдугаар сарын 15-17 ны хооронд болж өнгөрлөө. Хамгийн сэтгэл хөдөлгөсөн дорнод болон өрнөд бүсийн халз тулаан өнөөдөр тун сонирхолтой болж 163:155 харьцаатайгаар гурван жил дараалан хожигдоод байсан дорнодынхоны ялалтаар өндөрлөлөө.

Өрнөдийг Оклахома Сити Тандер багийн дасгалжуулагч Скотт Брүүкс, дорнодыг  Индиана Пэйсерс багийн дасгалжуулагч Фрэнк Вогель нар дасгалжуулсан юм. Энэ удаагийн үнэ цэнэтэй тоглогчийн шагналын эзэн хэн байх бол гэсэн таамаглалд Кевин Дурант, Блайк Грифн, Кармело Антони нар нэрлэгдэж байсан юм. Гэвч Клевленд Кавалерс багийн залуу од Кайри Ирвинг энэхүү нэр хүндтэй шагналын эзэн боллоо. Энэ бол хэний ч санаанд ороогүй биз.

Өдгөө 22 нас хүрч буй залуу тоглогч маань 31 оноо, 14 оновчтой дамжуулалт, таван удаа самбараас бөмбөг авснаар эргэлзээгүйгээр үнэ цэнэтэй тоглогч /MVP/-ийн цомыг өргөлөө. Бүх оддын тоглолт 62 удаа явагдахад нэгдсэн улсын сагсчид 62 удаа энэхүү цомыг өргөж байсан бол анхны тохиолдол нь Авсрали залуу Ирвинг боллоо.

Нэгэнт сагсан бөмбөгт тодрон гарч ирж буй залуу од Кайри Ирвингийн талаарх танилцуулгыг уншигч та бүхэндээ онцлон хүргэж байна. Тэрээр 1992 оны гуравдугаар сарын 23-нд Австралийн Мельбурне хотноо Дредерик Ирвинг болон Элизабет нарын хоёр дахь хүүхэд нь болж мэндэлсэн бөгөөд түүний аав нь Австралын «Буллин Бумерс» багт мэргэжлийн тоглогч байжээ. Тэдний гэр бүл Мельбурне хотын захын Кев гэдэг газар амьдардаг байсан ба Кайриг хоёр настай байхад нь АНУ-руу нүүсэн байна. Тэрээр АНУ болон Австралийн хоёр иргэншилтэй. Кайригийн ээж нь түүний хоёр настай байхад нь нас барж, Дредерикийг хүүгээ өсгөхөд нь түүний авга эгч нь тусалдаг байжээ. Тэр Нью Жерсид өссөн ба ихэвчлэн Насанд хүрэгчдийн лигт тоглодог аавыгаа даган сагсан бөмбөгийн орчинд хүн болсон байна.

Кайри хүүхэд байхдаа “Би сагсан бөмбөгийн тоглогч болно. Амлаж байна” хэмээн хэлж байж. Тэр Патрекийн ахлах сургуульд байхдаа дунджаар 26.5 оноо 10.3 оновчтой дамжуулалт 4.8 самбараас бөмбөг авалтын үзүүлэлттэй байсан ба 1000 онооны босгыг давж сургуульдаа амжилтаараа хоёрт эрэмблэгдэж байв. Тэрээр 2010 онд Америкийн ахлах сургуулиудын сагсан бөмбөгийн аварга шалгаруулах тэмцээнд, Жордан брендээс зохион байгуулдаг тэмцээнд тус тус үнэ цэнэтэй тоглогчоор шалгарсан аж. 

2011 онд Драфтын нэгдүгээр сонголтоор Клевленд Кавалерс багт очсон ба 2012 онд Шилдэг Рүүки тоглогчоор шалгарч, 2012 онд Пепси макстай хамтран бүтээсэн цуврал рекламд тоглосон авга ах “Древ”-ийн дүрээр тэр олонд танигдсан юм. Ингээд 2013 онд бүх оддын тоглолтонд сонгогдож 15 оноо, дөрвөн оновчтой дамжуулалт, гурван удаа самбараас бөмбөг авч, гурван онооны шидэлтийн аварга болж байжээ. Харин тэрээр энэ удаад бүх оддын тоглолтын үнэ цэнэтэй тоглогчоор шалгарсныхаа дараа “Энэ бол гайхалтай амжилт. Энэ онцгой зүйл Клевлендийн маань эргэн ирэлт хийхэд том түлхэц үзүүлэх болно” хэмээсэн юм.