Талбайн теннисний WTA ангилалын “Qatar Open” тэмцээн эдгээр өдрүүдэд Катарын Доха хотноо үргэлжилж байна. Энэ сарын 10-нд эхэлсэн “Qatar Open” тэмцээний ганцаарчилсан болон хосын төрлийн шөвгийн найм тодроод байна.

Энэ оны анхны “Их дуулга” болох “Австралийн нээлттэй тэмцээн”-нд түрүүлсэн БНХАУ-ын Ли На тус тэмцээнийг тэргүүлэн тоглосон. Тэрээр хоёрдугаар тойргоос тоглолтоо эхлүүлсэн ч гуравдугаар тойрогт Чехийн Петра Сэтковскад ялагдсанаар шөвгийн наймд шалгарч чадсангүй. Ли Наг буулган авсан Франц гаралтай Чех теннисний хувьд хагас шигшээд шалгарах эрхийн төлөө Германы Кербертэй оноолт таарчээ. Энэ хэсгээс гуравт эрэмбэтэй Чехийн Петра Квитова, Сербийн Елена Янкович (5) нар шалгараад байна. Харин тэмцээний хоёрт эрэмбэтэй тоглож буй Польшийн Агнешка Радваньска Белгийн Викмайертэй оноолт таарсан байна.

Тэмцээнд Ли Нагаас гадна АНУ-ын Винус Уильямс, Сербийн Ана Иваннович
нарын шилдэг теннисчид оролцсон ч хоёрдугаар тойргоос хэтрээгүй байна.

Хосын төрлийг өнгөрсөн сард “Австралийн нээлттэй тэмцээн”-нд түрүүлсэн Италийн Сара Эррина, Роберта Винчи нар тэргүүлэн тоглож байна бөгөөд тэд шөвгийн наймд шалгарчээ.

Нийт шагналын сан нь 2 сая 440 мянган ам.долларт багтаж буй тус тэмцээний ганцаарчилсан төрлийн аварга 441 мянган доллар, чансааны 900 оноо хүртэх бол хосын төрлийн аваргууд 126 мянган ам.доллар хүртэх аж. Тэмцээний аваргууд ням гаригт тодорно.