Талбан теннисний спортын “Их дуулга” ангилалд багтах “Уимбльдон” тэмцээн өнөөдөр эхэлж байна. 2010 оны Британийн нээлттэй тэмцээнийг нээж, өнгөрсөн жилийн аварга Рожер Федерер Лондонгийн Бүх английн клуб цэнгэлдэхийн төв талбайд Колумбын Алехандро Фаллатай тоглох юм. Сербийн Новак Жокович Бельгийн Оливер Рохустай эхний тоглолтоо мөн өнөөдөр хийнэ. Өнгөрсөн жилийн гайхамшигт финалын эзэн Энди Роддик эхний тоглолтоо өөрийн эх орон нэгт Ражив Рамтай тоглохоор оноолт таарчээ.

Харин эмэгтэй теннисчдийн шилдгүүдээс Елена Янкович зохион байгуулагч орны Лаура Робсонтой эхний тоглолтоо хийх юм. Маргааш дэлхийн №2 Рафаэль Надаль, Британийн №1 Энди Муррей болон эмэгтэйчүүдийн чансааг тэргүүлэгч Венус Уильямс зэрэг одод тоглолтоо хийнэ. Энэ жилийн “Уимбльдон” тэмцээн 21-нээс долдугаар сарын 4 хүртэл хагас сарын турш үргэлжилнэ. Шагналын сан нийт 12 сая 500 мянган фунт стерлингт хүрсэн нь өнгөрсөн жилийнхээс нэг саяар өссөн үзүүлэлт юм. Ингэснээр эрэгтэй, эмэгтэй ганцаарчилсан төрөлд түрүүлсэн теннисчид нэг сая фунтээр дансаа зузаалах бол финалд шалгарсан теннисчин 500 мянган фунтын шагнал хүртэнэ. Харин эхний шатанд ялалт байгуулбал 11250 фунт буюу манайхаар 23 сая төгрөгийн мөнгөн шагнал хүртэх тооцоо гарч байна.