Английн алдарт Сильверстоун уралдааны талбарт мото спортын элит ангилал болох MotoGP-гийн энэ улирлын тав дахь гараа Британийн гран-при уралдаан өчигдөр болж, Испанийн Хорхе Лорензо түрүүлснээр дэлхийн аваргын төлөөх өрсөлдөөнд тэргүүллээ улам бататгалаа. “Yamaha” багийн тамирчин тэрбээр ийнхүү улирлын гурав дахь түрүүгээ авсан бөгөөд хоёрдугаарт бариалсан “Honda”-гийн итали тамирчин Андреа Довизиосогоос бараг долоон секундын өмнө барианд орсон байна. Харин гуравт АНУ-ын Бен Спайс хурдалж, шагналын тавцанд гарчээ.

Ийнхүү Британийн гран-прид түрүү авснаар Лорензо 115 оноотой болж, дэлхийн аваргын төлөөх өрсөлдөөнийг тэргүүлж байгаа бол түүнээс 37 онооны зөрүүгээр Довизиосо удаалж байна.

Тэргүүн эгнээнээс гарч уралдсан Лорензо эхний тойрогт хоёр ч удаа Испанийн Дани Педросад гүйцэгдсэн боловч богино хугацаанд тэргүүллээ эргүүлэн олж авснаар тэр эрчээрээ хурдалсаар барианд оржээ. Тэрбээр уралдааны дараа “Өнөөдөр маш чухал өдөр байлаа. Мөргөлдөх, осол гарах бүрэн боломжтой уралдаан байсан ч миний хувьд анхаарлаа сайтар хандуулж, хашир болгоомжтой уралдсанаар түрүү авлаа” гэжээ.

Мөн өчигдөр болсон мото спортын Moto2 ангилалд Францын Жуле Клузель тэргүүлсэн бол 125сс ангилалд “Derbi” багийн тамирчин Испанийн Марк Маркез торгон жолоо өргөжээ.

Уралдааны ээлжит гараа ирэх амралтын өдрүүдэд Голландад үргэлжилнэ.

Британийн гран-при уралдааны дүн:

1.    Хорхе Лорензо /Испани/ – Yamaha
2.    Андреа Довизиосо /Итали/ – Honda
3.    Бен Спайс /АНУ/ – Yamaha
4.    Ники Хайден /АНУ/ – Ducati
5.    Кейси Стонер /Австрали/ – Ducati
6.    Рэнди де Пунье /Франц/ – Honda
7.    Марко Симончелли /Итали/ – Honda
8.    Дани Педроса /Испани/ – Honda
9.    Колин Эдвардс /АНУ/ – Yamaha
10.    Алейкс Эспаргаро /Испани/ – Ducati

С.Цэлмэг