Уул уурхайг даган хөгждөг салбар бол ханган нийлүүлэлт. Өмнө нь төдийлөн анзаарагддаггүй байсан энэхүү салбарт өнөөдөр дэлхийн томоохон пүүсүүдийн ч анхаарлыг татах болжээ. Хойшид Монголчуудад хамгийн ашигтай, үр өгөөжтэй зүйлүүдийн нэг нь ханган нийлүүлэлт байхыг ч үгүйсгэхгүй гэж эдийн засагчид хэлж байна. Тиймээс Эрдэс баялаг, уул уурхайн биржээс “Miner & Supplier 2013”  уул уурхайн ханган нийлүүлэлтийн форумыг энэ оны гуравдугаар сарын 14, 15-нд Чингис зочид буудалд зохион байгуулах гэж байна.

Энэ удаагийн форум нь улс орны нийгэм эдийн засагт оруулах хувь нэмрийг дээшлүүлэх, байгаль орчинд ээлтэй технологи, бүтээгдэхүүнийг түгээн дэлгэрүүлэх, ханган нийлүүлэгч болоод уул уурхайн бизнесмэнүүдийн хоорондын бизнесийн уялдаа харилцааг нэмэгдүүлэх зэрэг асуудлуудыг багтаасан хэд хэдэн зорилгын хүрээнд болохоор болжээ.Форумд оролцогчдыг бүртгэж эхэлсэн бөгөөд энэ талаарх  дэлгэрэнгүй мэдээллийг 70116009, 99081050 тоот утас болон www.minerandsupplier.com –вэб сайтаас авч болох юм байна.